Sjáðu alla sem hafa fengið titilinn Í­þrótta­maður ársins: Nýr í hópinn í kvöld

Fyrsti íþróttamaður ársins var kjörinn Vilhjálmur Einarsson árið 1956 en þrístökkvarinn fékk þessi verðlaun þrjú fyrstu árin og alls fimm sinnum á fyrstu sex árunum. Vilhjálmur er einnig sá sem hefur fengið titilinn oftast einu sinni oftar en handboltamaðurinn Ólafur Stefánsson.

Samtök íþróttafréttamanna (SÍ) kjósa ár hvert Íþróttamann ársins, Lið ársins og Þjálfara ársins. Við val á íþróttamanni ársins taka atkvæðisbærir félagar innan SÍ tillit til árangurs, reglusemi, ástundunar, prúðmennsku og framfara. Þrjátíu íþróttafréttamenn greiddu atkvæði í ár.

Þrjú af þeim tíu sem eru tilnefnd í ár hafa áður hlotið titilinn Íþróttamaður ársins en það eru núverandi íþróttamaður ársins Glódís Perla Viggósdóttir sem og handboltamennirnir Gísli Þorgeir Kristjánsson og Ómar Ingi Magnússon.

Fjögur af þeim tíu sem eru tilnefnd í ár eru tilnefnd í fyrsta sinn en það eru Dagur Kári Ólafsson, Hákon Arnar Haraldsson, Hildur Maja Guðmundsdóttir og Jón Þór Sigurðsson.

Kjörinu verður lýst frá Hörpu í kvöld. Ríkissjónvarpið sýnir beint frá athöfninni eins og síðustu ár en á samfélagsmiðlum birti RÚV myndir af öllum þeim 47 sem hafa verið kosin Íþróttamaður ársins frá 1956. Fjórtán af þessum 47 hafa verið kosin oftast en einu sinni.

Tíu íþróttagreinar hafa eignast Íþróttamann ársins en sú ellefta gæti bæst í hópinn í kvöld því íþróttafólk úr ólympískum lyftingum, skotfimi og fimleikum er tilnefnt að þessu sinni.

Hér fyrir neðan má sjá alla sem hafa fengið titilinn Íþróttamaður ársins frá 1956 til 2024.

Í desember 2006 var kynntur til leiks nýr verðlaunagripur sem ætlaður er íþróttamanni ársins. Þjóðminjasafni Íslands var við þetta tækifæri falið að varðveita styttuna góðu sem hafði fylgt sæmdarheitinu Íþróttamaður ársins frá 1956.

Nýi verðlaunagripurinn sem ÍSÍ gaf SÍ var hannaður af Sigurði Inga Bjarnasyni gullsmið en það var forseti ÍSÍ, Ólafur Rafnsson, sem afhenti formanni SÍ stofnskrá verðlaunagripsins og hann þar með til varðveislu næstu 50 árin. Íþróttamaður ársins mun einnig fá eignarbikar sem vísar til stóra verðlaunagripsins og hannaður er af sama gullsmið.

Verkið er smíðað með vísun í náttúru Íslands sem mótað hefur þessa þjóð og hennar þrótt. Náttúra Íslands endurspeglast í margvíslegu efni verksins, lögun þess og litbrigðum. Þessir eiginleikar verksins vísa um leið til fjölbreytni íþróttanna og þess styrks og þeirrar þrautseigju sem einkenna afreksmenn íslenskra íþrótta hverju sinni.