Freyr lætur af störfum sem for­stjóri Kapps

Í fréttatilkynningu þess efnis segir að Kapp sé íslenskt tæknifyrirtæki sem sérhæfi sig í kæliþjónustu, framleiðslu, sölu og þjónustu á tækjabúnaði fyrir sjávarútveg, fiskeldi, kjúklingaframleiðslu, smávöruverslanir og annan iðnað.

Stofnaði félagið með tvær hendur tómar

Freyr hafi stofnað Kapp ásamt eiginkonu sinni Elfu Hrönn Valdimarsdóttur fyrir 27 árum en félagið hafi vaxið gríðarlega á þeim tíma. Félagið hafi fyrir nokkrum árum Kami Tech Inc. í Seattle í Bandaríkjunum og hafi síðan tekið til við framleiðslu á Kapp búnaði þar í landi. Jafnframt hafi Kapp byggt upp öflugt sölu- og markaðsstarf á alþjóðlegum markaði og nú þegar sjáist árangur af þeirri uppbyggingu. Á sama tíma hafi Kapp keypt allar eignir og einkaleyfi úr þrotabúi Skagans 3X og endurreist starfsemi fyrirtækisins undir merkjum Kapps. Með þessum kaupum hafi félagið styrkt stöðu sína verulega á sviði hátæknilausna fyrir matvælaiðnað og bætt við sig þekkingu og vörum, sem falli vel að núverandi starfsemi.

„Þetta hefur verið mikið ævintýri. Ég stofnaði Kapp með tvær hendur tómar fyrir 27 árum og þá aðeins 23 ára gamall. Ég er ekki hættur en fylgist nú með rekstrinum og hef góða yfirsýn yfir allt sviðið sem stjórnarformaður. Ólafur Karl tekur nú við stjórnartaumunum sem forstjóri og ég treysti honum afar vel til að stýra félaginu á þeirri góðu vegferð sem það er á. Reynsla hans mun nýtast Kapp vel til frekari vaxtar og styrkingar hér heima sem og á alþjóðavettvangi,“ er haft eftir Frey.

Þakkar traustið

Þá er haft eftir Ólafi Karli að hann sé þakklátur því trausti sem honum hafi verið sýnt með ráðningunni í starf forstjóra félagsins. Freyr og fjölskylda hans hafi byggt upp góðan rekstur og sterkt vörumerki Kapps með mikilli seiglu, framtíðarsýn og dugnaði í gegnum árin.

„Verandi alinn upp í fjölskyldurekstri sjálfur, er það mér sérstaklega mikill heiður að vera sýnt það mikla traust að fá að leiða KAPP inní næsta vaxtakafla. Við Freyr erum með sömu sýn á áherslur í rekstri og framtíð félagsins, því hlakka ég mikið til þess að takast á við verkefnið með sterku starfsfólki KAPP. Félagið á að baki afar gott rekstrarár þar sem fjölmörg framfaramál og áhugaverðar fjárfestingar hafa markað spor í starfsemina. Það var stórt skref stígið í lok 2024 með því að fara í þær stóru fjárfestingar sem við gerðum. Það er mikil vinna fólgin í því að samþætta rekstur nokkura félaga undir merkjum KAPP en halda á sama tíma sjó innan þeirra rekstrareininga sem við rákum fyrir. Við höfum hér um bil tvöfaldað starfsmannafjöldan síðastliðið ár og veltan vaxið í sama hlutfalli. Næsta ár fer í að byggja ofan á þennan góða grunn og halda áfram að þróast. Ég hlakka til komandi ára með öflugu starfsfólki félagsins og náinni samvinnu við viðskiptavini.“