Liverpool-vandræðin halda á­fram og Bournemouth með sigur­mark í blá­lokin

Liverpool tapaði sínum fyrsta deildarleik síðan í nóvember þegar liðið heimsótti Bournemouth á suðurströndina í ensku úrvalsdeildinni í dag.

Bournemouth vann dramatískan 3-2 sigur þökk sé sigurmarki Amine Adli í uppbótartíma leiksins.

Dominik Szoboszlai hélt að hann hefði tryggt Liverpool fimmta jafnteflið í röð með laglegu skoti fyrir utan teig eftir stutta aukaspyrnu frá Mohamed Salah. Það mark kom á 80. mínútu og Liverpool-menn reyndu að sækja sigurinn.

Það voru hins vegar heimamenn sem tryggðu sér sigur með marki eftir darraðardans og vandræði í Liverpool-vörninni eftir langt innkast. Boltinn féll á endanum fyrir Amine Adli sem kom honum í netið.

Leikmenn og knattspyrnustjóri Liverpool, Arne Slot, mótmæltu en þeir gátu engum kennt um nema sér sjálfum.

Hræðileg mistök Virgil van Dijk færðu Bournemouth mark á silfurfati á 26. mínútu og Evanilson nýtti sér það. Joe Gomez meiddist í aðdraganda marksins og var enn úti af vellinum þegar Alex Jimenez kom Bournemouth í 2-0 á 33. mínútu.

Virgil van Dijk bætti aðeins fyrir mistökin þegar hann skallaði hornspyrnu Dominik Szoboszlai í markið rétt fyrir hálfleik.

Liverpool reyndi allt til að jafna metin í seinni hálfleik en það tókst ekki fyrr en tíu mínútum fyrir leikslok. Þá var von á sigurmarki en eins og oft áður á þessu tímabili féllu hlutirnir ekki fyrir Liverpool-mönnum á lokasekúndunum og þeir fengu enn á ný á sig svekkjandi og súrt mark sem kostaði liðið stig.

Leikmenn Bournemouth fögnuðu gríðarlega enda langt síðan liðið vann Liverpool og það hafa ekki verið margir sigrar hjá liðinu að undanförnu.