Bayern tapaði deildar­leik í fyrsta sinn á tíma­bilinu

Leikurinn byrjaði vel fyrir Bayern og Hiroki Ito kom heimamönnum yfir um miðjan fyrri hálfleik, eftir stoðsendingu Michael Olise.

Augsburg tókst síðan mjög óvænt að snúa leiknum við í seinni hálfleik. Arthur Chaves og Han-Noah Massengo skoruðu mörk með stuttu millibili, á 75. og 81. mínútu.

Gestunum tókst síðan að halda út og fögnuðu sigri þökk sé góðum varnarleik þegar Bæjarar sóttu stíft undir lokin.

Þetta var fyrsta tap Bayern Munchen í þýsku deildinni á þessu tímabili og það fyrsta síðan 8. mars á síðasta ári. 

Sextán sigrar og tvö jafntefli skiluðu sér í fyrstu átján umferðunum í deildinni og á öllu tímabilinu hefur Bayern aðeins tapað einum leik, í Meistaradeildinni gegn Arsenal. 

Tapið var einkar óvænt því Augsburg situr í 13. sæti deildarinnar.