Nýjar upp­lýsingar um heilsu­far Michaels Schumacher

Hinn 57 ára gamli Michael Schumacher slasaðist alvarlega í skíðaslysi árið 2013. Síðan þá hefur heilsufar formúlu 1-goðsagnarinnar verið hulið leyndardómi. 

Ástæðan er sú að Schumacher-fjölskyldan hefur meðvitað valið að deila ekki upplýsingum um föður sinn og eiginmann með almenningi. Aðeins um tuttugu traustum einstaklingum er heimilt að heimsækja hann eða vita um aðstæður hans.

Formúlu 1-fréttamaðurinn Felix Görner er einn af örfáum blaðamönnum sem hafa getað fylgst nánar með aðstæðum Schumachers í gegnum árin.

„Ástandið er mjög sorglegt. Hann þarfnast stöðugrar umönnunar og er algjörlega háður umönnunaraðilum sínum. Og hann getur ekki lengur tjáð sig með orðum,“ hefur Felix Görner sagt áður.

Nú segist Daily Mail hafa nýjar upplýsingar um Michael Schumacher og líf hans á heimili sínu á Majorka.

Schumacher, sem lengi lá í dái, er sagður ekki vera algjörlega rúmliggjandi. Samkvæmt nokkrum heimildum breska blaðsins er Schumacher vissulega háður hjólastól. Í hjólastólnum fær Schumacher hjálp frá hjúkrunarfræðingum og meðferðaraðilum við að komast um – bæði í og við setrið á Majorka.

Á sama tíma er aðalheimili fjölskyldunnar enn sagt vera húsið í Gland í Sviss, þótt fjölskyldan dvelji reglulega á Majorka.

Michael Schumacher er einn fremsti formúlu 1-ökumaður allra tíma. Þjóðverjinn vann sjö heimsmeistaratitla á ferli sínum.