Tunglskotinu frestað til mars vegna leka

Starfsmenn NASA byrjuðu í gær að dæla eldsneyti á SLS-eldflaugina og komu þá í ljós nokkrir lekar. Sambærilegir lekar leiddu til tafa með fyrsta geimskot Artemis-áætlunarinnar fyrir rúmum þremur árum síðan.

Sjá einnig: Á fleygiferð til tunglsins

Að þessu sinni stendur til að flytja fjóra geimfara sem eiga að fara á braut um tunglið, um borð í Orion-geimfari, og aftur til jarðar yfir tíu daga tímabil. Þeir voru nýlega settir í tveggja vikna sóttkví fyrir geimferðina en hefur nú verið hleypt út aftur, eftir að geimskotinu var frestað, samkvæmt AP fréttaveitunni.

Þetta verður í fyrsta sinn frá tímum Apollo-áætlunarinnar sem menn verða sendir til tunglsins.

Ekki liggur fyrir nákvæmlega hvenær í mars til stendur að reyna aftur að skjóta Artemis 2 af stað en forsvarsmenn NASA segja vísindamenn þurfa tíma til að fara yfir gögnin sem búið er að afla á síðustu dögum.

Tilraunin sem hófst í gær gengur út á að dæla um 2,6 milljón lítrum af ofurkældu vetni og súrefni inn á tanka SLS og líkja eftir aðdraganda raunverulegs geimskots. Það tókst ekki, þar sem mikill þrýstingur myndaðist neðst í eldflauginni.

Dæling eldsneytis var tvisvar sinnum stöðvuð í gær áður en hætt var við tilraunina.

Artemis-áætlunin snýst í stuttu máli um að senda geimfara aftur til tunglsins og koma þar upp varanlegri viðveru. Nota á tunglið sem stökkpall lengra út í sólkerfið. Í grískri goðafræði er Artemis systir Apollos. Artemis 2 er eins og nafnið gefur til kynna, annað geimskotið í áætluninni.

Um mitt ár 2027 á, samkvæmt áætlunum NASA, að lenda geimförum á tunglinu í fyrsta sinn frá desember 1972, þegar geimfararnir Gene Cernan og Harrison Schmitt urðu ellefti og tólfti maðurinn til að ganga á yfirborði tunglsins.