Slysið stoppar ekki 41 árs Vonn sem keppir með slitið kross­band

Krossbandsslit halda íþróttafólki vanalega frá keppni í 9-12 mánuði en hin 41 árs gamla Vonn ætlar sér samt sem áður að keppa á Vetrarólympíuleikunum sem væntanlega verða hennar síðustu leikar.

Vonn hefur lagt á sig gríðarlega vinnu við að komast aftur í allra fremstu röð, eftir fimm ára hlé 2019-24 og hnjáskiptiaðgerð, og er efst í stigakeppninni í bruni á heimsbikarmótaröðinni í vetur.

Þess vegna þótti hún einna líklegust til að landa gullverðlaunum í bruni á Ítalíu á sunnudaginn en það breyttist allt þegar hún meiddist á heimsbikarmóti í Sviss síðasta föstudag. 

Hún var flutt með þyrlu á sjúkrahús eftir slysið og var ein þriggja sem féllu í brautinni, áður en keppnin var blásin af.

Vonn segir að þrátt fyrir allt sé hnéð „stöðugt, sterkt og ekki bólgið“ og þess vegna sé hún viss um að geta keppt á Vetrarólympíuleikunum. Brunkeppnin er þar efst á lista hjá henni.

„Á meðan enn er möguleiki þá reyni ég“

„Þetta er auðvitað ekki eitthvað sem ég vonaðist eftir. Ég hef lagt mjög mikið á mig til að komast á þessa leika á allt öðrum forsendum,“ sagði Vonn á blaðamannafundi í Cortina í dag. Hún kvaðst hafa skíðað í dag og að hnéð hefði þá haldið vel, án sársauka, en að hún myndi ekki vita stöðuna almennilega fyrr en í brunbrautinni.

„Ég veit hverjar líkur mínar voru fyrir slysið og ég veit að líkurnar eru ekki þær sömu núna, en ég veit samt að möguleikarnir eru enn til staðar. Á meðan enn er möguleiki þá reyni ég,“ sagði Vonn meðvituð um efasemdir fólks um að hún gæti keppt með slitið krossband.

„Þetta er ekki eitthvað sem ég þekki ekki. Ég hef gert þetta áður. Ég vildi óska að ég væri ekki í þessari stöðu en ég geri mitt besta. Ég ætla ekki að fara heim og sjá eftir því að hafa ekki reynt. Ég mun gera allt sem í mínu valdi stendur til að standa þarna í rásmarkinu,“ sagði Vonn.