Heims­meistarinn býst við meiri ringul­reið í for­múlunni

Íþróttin stendur frammi fyrir stærstu reglubreytingu í sögu sinni, þar sem vélar, undirvagn, eldsneyti og dekk lúta öll nýjum kröfum.

Orkustjórnun rafhlöðunnar verður miðlægur þáttur, þar sem vélarnar fá nú meira af heildarafli sínu frá rafmagnshluta tvinnkerfisins.

„Það verður meiri ringulreið í keppnum þar sem ökumaður þarf að vera aðeins betur með á nótunum varðandi allar þessar mismunandi aðstæður sem geta komið upp,“ sagði Lando Norris.

Meiri áhersla á hæfni ökumanna

„Og það mun gerast allt árið, myndi ég segja. Það er lögð meiri áhersla á hæfni ökumanna til að stjórna öllum þessum hlutum,“ sagði Norris.

McLaren-ökumaðurinn sagði að notkun nýja „boost-hnappsins“, sem gefur aukaskot af raforku, og áhrif þess á hleðslustöðu rafhlöðunnar verði lykilatriði í nýju sniði F1.

„Það verður hægt að þvinga fólk meira í mismunandi stöður og skapa keppni á hugsanlega betri hátt en áður hefur verið hægt. Og það er líklega betra, það er gott,“ sagði Norris.

Fleiri framúrakstrar með auknum hraða

Norris byggir snemmbúið mat sitt á bílunum á „shakedown“-prófuninni sem haldin var í Barcelona í síðustu viku. Tvær þriggja daga æfingalotur til viðbótar fara fram í Barein á næstu tveimur vikum og hefjast þann 11. febrúar.

Hann segir að nýju vélarnar og þörfin á að stjórna orku gætu leitt til þess að ökumenn skipti oftar um sæti.

„Það verður meira jójó, fleiri framúrakstrar með auknum hraða. En sá aðili gæti þá þurft að verjast meira en áður hefur sést og það mun skapa meiri ringulreið, sem er frábært fyrir ykkur,“ bætti Norris við.