„Má ekkert segja um þessa dómara en þetta var hræði­legt“

„Mér fannst leikurinn tekinn frá okkur. Meira að segja þegar Haukar reyndu að brjóta undir lokin til þess að senda okkur á vítalínuna fengu þær ekki einu sinni villu. Það spilar enginn í deildinni fastari vörn en Haukar sem fengu tvær villur undir lokin og þær voru hangandi á okkur en við fengum ekki neitt. Þetta var galið,“ sagði Ólafur Jónas og hélt áfram að tala um dómara leiksins.

„Þetta var galið í fjórða leikhluta. Það má ekkert segja um þessa dómara en þetta var hræðilegt í dag. Djöfull er ég fúll.“

Haukar komust í fyrsta skipti yfir þegar ein og hálf mínúta var eftir. Ólafur var afar ánægður með margt í leik Stjörnunnar í kvöld.

„Við gerðum margt ótrúlega vel. Við hættum að hlaupa okkar kerfi í fjórða leikhluta og fórum í einn á einn sem gengur yfirleitt illa hjá okkur. Mér fannst við búnar á því undir lokin þar sem það er erfitt að spila á móti Haukum sem voru að pressa allan leikinn,“ sagði Ólafur Jónas að lokum.