„Ég er ekki kærastan“

Norðmaðurinn vakti heimsathygli fyrir að játa opinberlega framhjáhald með kærustu sinni í beinni útsendingu eftir að hafa unnið bronsverðlaun á Vetrarólympíuleikunum. Óvænta játningin vakti forvitni á netinu og margir fóru að leita að konunni sem sögð er tengjast málinu.

Stærstu mistök lífs míns

Tilfinningaþrungið viðtal Sturlu fór líklega ekki fram hjá mörgum. „Fyrir sex mánuðum kynntist ég ástinni í lífi mínu, fallegustu og góðhjörtuðustu manneskju í heimi. Fyrir þremur mánuðum gerði ég stærstu mistök lífs míns og hélt fram hjá henni. Ég sagði henni frá því fyrir viku. Þetta hefur verið versta vika lífs míns.“

Að sjálfsögðu var mikil forvitni um hver þessi kærasta er og fólk var spennt að heyra hennar hlið á málinu. En þegar aðdáendur leituðu að fyrrverandi kærustunni sem hann vísaði til, fór eitt nafn á flug, nafn Chloe Levins.

Chloe Levins er bandarísk skíðaskotfimikona og er einnig fyrrverandi kærasta Lægreid. Þessi 27 ára gamla kona er tvöfaldur Bandaríkjameistari og hefur keppt á fjórum heimsmeistaramótum fullorðinna (2021, 2023, 2024 og 2025). Hún keppir nú í heimsbikarnum í skíðaskotfimi og er talin sterkur keppandi fyrir Vetrarólympíuleikana í Mílanó-Cortina 2026. Fyrir utan skíðaskotfimi er hún einnig afrekskylfingur.

Þessi umræða og orðrómur fór ekkert fram hjá Levins og var á endanum orðinn svo sterkur og þráðlátur að hún ákvað að stíga fram og segja sannleikann.

Ég fæ margar spurningar

„Nafn mitt hefur verið nefnt, myndir af mér hafa verið notaðar og ég fæ margar spurningar um norska skíðaskotfimimanninn sem minntist á fyrrverandi kærustu sína á Ólympíuleikunum,“ byrjaði Chloe Levins.

„Ég vil taka það skýrt fram að ég er ekki fyrrverandi kærastan sem Sturla er að vísa til. Við áttum í stuttu sambandi og við slitum því fyrir tæpum fimm árum,“ sagði Levins.

„Það eina sem ég vil segja um þetta mál er að ég óska Johan-Olav Botn til hamingju með sigurinn í einstaklingskeppni karla. Það var bæði áhrifamikið og hjartnæmt að sjá hann kalla nafn látins liðsfélaga síns, Sivert Guttorm Bakken, þegar hann fór yfir marklínuna og hugur minn er hjá Sivert og vinum hans og fjölskyldu,“ sagði Levins.

Bætti við tveimur verðlaunum eftir viðtalið

Sturla hefur síðan unnið tvenn verðlaun til viðbótar. Hann vann sín þriðju verðlaun á mótinu þegar hann lenti í öðru sæti í 12,5 km skíðaskotfimi karla á eftir gullverðlaunahafanum Martin Ponsiluoma frá Svíþjóð. Önnur verðlaun hans voru bronsverðlaun í 10 kílómetra sprettgöngu karla.

Hann hefur hingað til neitað að nafngreina þá manneskju sem hann ræddi um í viðtalinu, þó að hann hafi greint frá því að hann hafi sagt henni frá framhjáhaldinu áður en hann hóf keppni í Mílanó.