Jón Erik eftir frá­bæra frammi­stöðu á ÓL: „Draumur orðinn að veru­leika“

„Mér líður bara fáránlega vel,“ segir Jón Erik í samtali við íþróttadeild Sýnar. „Þetta er draumur orðinn að veruleika, að ná svona góðum árangri á Ólympíuleikum. Ég er bara mjög sáttur.“

Með því að enda í 25.sætinu í svigkeppni gærdagsins nær Jón Erik besta árangri Íslendings á Vetrarólympíuleikunum í Mílanó og Cortina til þess og er árangur hans, hvað sæti varðar, um leið sá besti í tvo áratugi í svigi hjá Íslendingi en árið 2006 endaði Björgvin Björgvinsson í 22.sæti á Vetrarólympíuleikum þess árs.

„Ég var eiginlega ekki ánægður með fyrri ferðina. Þetta var aðeins of öruggt skíðað hjá mér og aðeins of tæpt. En þetta reddaðist og ég náði þá að gera betur í seinni ferðinni. 

Jón Erik varð í þrítugasta sæti í fyrri ferðinni og fékk því að skíða með úrvalshópnum. Jón Erik fór fyrstur af stað í seinni ferðinni og náði frábærri ferð.

Jón kláraði fyrri ferðina af öryggi á 1:04,51 mín en þá síðari glæsilega á 1:01,12 mín. og var því um svaka bætingu hjá honum milli ferða. Hann vann sig líka upp um fimm sæti og endaði því í 25. sæti. Aðeinn einn annar skíðamaður vann sig upp um fleiri sæti í seinni ferðinni.

„Það var bara geðveikt að fá að fara þarna fyrstur af stað með öllum stjörnunum, tilfinningin sem fylgdi því var geðveik. Mér leið eins og ég væri bara á akkúrat rétta staðnum þá.“

Sjá mátti að Jón Erik var kampakátur með seinni ferð sína í dag og þegar hann kom í mark beindi hann athygli sinni að myndavélinni og sagði á mjög skýran hátt: „Takk fyrir mig“

„Ég var búinn að lofa flugeldasýningu og var því bara að þakka fyrir mig.“