Selja hús­næði Vélfags á Ólafs­firði

Húsnæði Vélfags á Múlavegi 18 á Ólafsfirði var auglýst til sölu fyrir 65 milljónir króna í haust. Kaupandi að húsinu er nú fundinn með fyrirvara um fjármögnun. Vélfag, sem framleiðir ýmsan tækjabúnað fyrir sjávarútveg, var stofnað á Ólafsfirði fyrir um þrjátíu árum.

Fjármögnun er þó ekki eini fyrirvarinn á sölunni því bæði utanríkisráðuneytið og Arion banki þurfa að gefa grænt ljós á viðskiptin í ljósi viðskiptaþvingana sem aðaleigandi Vélfags sætir vegna ætlaðra tengsla við svonefndan skuggaflota Rússa. Vélfag framleiðis ýmsan tækjabúnað tengdan sjávarútvegi.

Starfsemi Vélfags hefur legið niðri um margra mánaða skeið eftir að Arion banki frysti fjármuni þess á grundvelli viðskiptaþvingana Evrópusambandsins gangvart Rússlandi síðasta sumar. Héraðssaksóknari gerði húsleit hjá Vélfagi og handtók lykilstjórnendur í síðasta mánuði í tengslum við rannsókn á meintum brotum gegn refsiaðgerðunum.

Björn Davíðsson, fasteignasali hjá Hvammi sem annast söluna, segir söluferlið enn í gangi og að það ætti að skýrast á næstu tveimur til þremur vikum hvort hún gangi eftir. Hann segir að leyfi hafi fengist fyrir sölu á húsnæði Vélfags að Baldursnesi á Akureyri í fyrra eftir fjármunir félagsins voru frystir.

Vélfag hefur haft starfsemi í húsnæðinu að Múlavegi frá árinu 2012, að því er kom fram í frétt Héðinsfjarðar, fréttavefs Fjallabyggðar, í haust.

Hæstiréttur ætlar að taka fyrir mál Vélfags og Ivans Kaufmann, meirihlutaeiganda fyrirtækisins, sem krefjast þess að utanríkisráðuneytið aflétti frystingu fjármuna þess.