Brynjar ráðinn korter í kosningar

Brynjar hefur verið skráður á vef Alþingis sem starfsmaður þingflokksins. Hann dró á dögunum til baka umsókn sína sem héraðsdómari og sagðist hafa viljað svara kalli Sjálfstæðisflokksins í komandi borgarstjórnarkosningum.

Á skrifstofu Alþingis, í hópi aðstoðarmanna, hittir Brynjar fyrir Helga Brynjarsson son sinn sem er á meðal sjö starfsmanna flokksins á þinginu. Sjálfstæðisflokkurinn hefur fimm stöðugildi á skrifstofunni en dæmi eru um að starfsfólk hafi ekki verið í fullu hlutfalli. Þannig var Andri Steinn Hilmarsson bæjarfulltrúi í Kópavogi á móti í hálfu starfi fyrir þingflokkinn. Full laun starfsfólks þingflokka eru um 1130 þúsund krónur.

Listi yfir að starfsmenn þingflokks og aðstoðarmenn formanna, en þar eru 28 á skrá, er forvitnileg lesning. Þar eru nokkrir fyrrverandi þingmenn auk Brynjars svo sem Unnur Brá Konráðsdóttir sem var í eina tíð forseti Alþingis og Ásta Guðrún Helgadóttir starfsmaður Samfylkingarinnar en hún sat á þingi fyrir Pírata. Einnig má nefna Gunnar Braga Sveinsson sem titlaður er aðstoðarmaður Miðflokksins en hann sat á þingi fyrir Framsóknarflokkinn. Þarna eru jafnframt gömul brýni úr blaðamannastétt á borð við Heimi Má Pétursson fyrrverandi fréttahaukur Stöðvar 2 fyrir Flokk fólksins og Tómas Þór Þórðarson íþróttafréttamann fyrir Sjálfstæðisflokkinn. Þar má að auki finna félaga af gamla Kjarnanum, þá Þórð Snæ Júlíusson og Arnar Þór Ingólfsson fyrir Samfylkinguna.

Ekki náðist í Brynjar við vinnslu fréttarinnar.