Lyftuklaufinn út­skrifaður af sjúkra­húsi og segir krafta­verk að hann geti gengið

Hinn 36 ára gamli Pavan neyddist til að draga sig úr keppni á Opna suðurafríska mótinu í Stellenbosch í Suður-Afríku því kvöldið fyrir mótið féll hann þrjár hæðir niður lyftustokk í byggingunni þar sem hann leigði gistingu.

Pavan hafði kallað á lyftuna en þegar hann steig inn var engin lyfta þar. Pavan var fluttur í skyndi á sjúkrahús með alvarlega áverka á öxl og brot á nokkrum hryggjarliðum, ásamt öðrum meiðslum. Hann fór í bráðaaðgerð á hægri öxl og baki síðastliðinn miðvikudag.

Eiginkonan flaug út

Eiginkona Pavans, Audra, flaug frá heimili þeirra í Dallas, þar sem hún var með þremur börnum þeirra, til Suður-Afríku til að vera hjá eiginmanni sínum.

Pavan sendi frá sér yfirlýsingu síðastliðinn föstudag þar sem hann þakkaði læknum sínum á Mediclinic Cape Town-sjúkrahúsinu, auk starfsfólks DP World Tour, kylfingum og kylfusveinum sem heimsóttu hann á sjúkrahúsið, og suðurafríska kaupsýslumanninum Johann Rupert og eiginkonu hans, Gaynor.

Á miðvikudaginn gaf Pavan uppfærslu og sagði að hann hefði verið útskrifaður af sjúkrahúsinu og myndi dvelja í Suður-Afríku í fimm vikur í viðbót áður en hann flygi heim til að halda áfram endurhæfingu á öxl, baki og öðrum marblettum og meiðslum.

„Í dag var stór dagur“

„Í dag var stór dagur,“ skrifaði Pavan. „Ég var útskrifaður af sjúkrahúsinu til að halda áfram endurhæfingu minni í gistingu í nágrenninu sem Rupert-fjölskyldan var svo vinsamleg að útvega mér. Það er sannarlega kraftaverki líkast að geta gengið og byrjað að sinna einföldum athöfnum, þótt það sé á mjög hægum og varkárum hraða. Ég vil þakka öllu starfsfólki Mediclinic, öllum skurðlæknum, hjúkrunarfræðingum og öllum sem hafa gert þennan ótrúlega bata mögulegan,“ skrifaði Pavan.

„Guð hefur svarað mörgum bænum, það er sannarlega eins og hönd hans sé yfir bata mínum. Leiðin er mjög löng en þetta litla skref er mjög gott,“ skrifaði Pavan.