Hóta höfnum eftir árás á „krúnudjásnið“

Agnar Már Másson skrifar 14. mars 2026 20:41

Íranir biðla til fólks í Sameinuðu arabísku furstadæmunum að rýma hafnir, bryggjur og einnig „felustaði Bandaríkjamanna“. Bandaríkin gerðu árás á „krúnudjásnið“ Kharg í nótt og eru Íranir hinir reiðustu fyrir vikið. Samsett Mynd

Bandaríkin gerðu árás á aðalútflutningshöfn Írana í nótt og írönsk stjórnvöld hóta nú að ráðast á hafnir í Sameinuðu arabísku furstadæmunum, sem gæti valdið talsverðri stigmögnun á stríðinu í Mið-Austurlöndum. Bandaríkjaforseti heldur því fram að Bretar, Kínverjar og Frakkar ætli meðal annars að aðstoða við að tryggja örugga olíuflutninga um Hormússund en téð ríki eiga enn eftir að staðfesta það. Enn hefur ekkert sést til æðstaklerks Írans.

Að sögn Reuters hafa hið minnsta tvö þúsund manns fallið í stríði Bandaríkjanna og Ísrael við Íran sem er nú komið á þriðju viku. Flest dauðsföllin eru í Íran en einhver í nágrannaríkjum.

Í nótt sprengdu Bandaríkjamenn skotmörk á smáeyjunni Kharg í Íran, sem er aðalútflutningshöfn Írana fyrir hráolíu. Þaðan kemur um 90 prósent af olíu frá Íran.

Bandaríkjaher sagðist í færslu á X aðeins hafa ráðist á hernaðarmannvirki á eyjunni.

Kharg er lítil eyja í Persaflóa sem tilheyrir Íran. Hún er ein mikilvægasta miðstöð landsins fyrir olíuflutninga og er fyrir vikið kölluð „krúnudjásn“ landsins.AP

Íranir heita nú hefndum þar sem þeir segjast nú hafa ákveðin mannvirki í Mið-Austurlöndum í sigtinu sem tengjast Bandaríkjunum.

Írönsk drónaárás hefur þegar haft áhrif á olíuflutninga í Sameinuðu arabísku furstadæmunum í dag, nánar til tekið í Fujairah, þar sem stór reykmökkur sást stíga upp þar sem Bandaríkjamenn höfðu gert árás.

Reykmökkur stígur upp úr olíumannvirki í arabíska furstadæminu Fujairah eftir árás í dag,AP

Sendiráð Bandaríkjanna í Bagdad, höfuðborg Íraks, hefur nú brýnt fyrir bandarískum ríkisborgurum að yfirgefa landið eftir að vígamannahópur sem nýtur stuðnings Írana lýsti yfir ábyrgð á árás á senidráðið.

Árás á ísskápaverksmiðju

Hið minnsta fimmtán féllu í loftárás sem gerð var á ísskápa- og ofnaverksmiðju í Isfahan í Mið-Íran í dag, samkvæmt hálfríkisreknu fréttaveitunni Fars. Ísraelsher og Bandaríkjaher hafa ekki tjáð sig um árásina.

Talsmaður íranska hersins hvatti fólk í Sameinuðu arabísku furstadæmunum til að rýma hafnir, bryggjur og „felustaði Bandaríkjamanna“ og sagði að bandarískar hersveitir hefðu gert árásir á íranskar eyjar frá þessum svæðum.

Íranskur maður hrópar er hann fylgist með líki hershöfðingjans Ali Shamkhani vera borið til grafar í Tehran.AP

Donald Trump Bandaríkjaforseti hélt því fram í samfélagsmiðlafærslu í dag að „mörg lönd“ hygðust senda orrustuskip til Mið-Austurlanda til þess að greiða fyrir olíuflutningum um Hormússund.

Hann nefndi þar Kína, Frakkland, Suður-Kóreu, Breta og fleiri en ekkert þessara ríkja hefur staðfest þetta. Haft er eftir talsmanni bresku ríkisstjórnarinnar í frétt Reuters að samræður standi yfir um hvernig megi tryggja olíuflutning á svæðinu.

Mojtaba Khamenei, sem er tekinn við sem æðstiklerkur eftir að Ísraelsher felldi föður hans í lok febrúar, hefur sagt að Hormússund eigi enn að vera lokað. Khamenei hefur ekki sést opinberlega frá því að stríðið hófst og hefur aðeins verið haft eftir honum úr skriflegum yfirlýsingum sem lesnar eru í ríkissjónvarpi Írans.

Mynd af Mojtaba Khamenei fyrir framan föður hans, Ali Khamenei.AP/Vahid Salemi

Um 800 manns fallið í Líbanon

Ísraelsmenn hafa gert árásir á fjölda skotmarka sem þeir segja tengjast Hezbolla síðustu tvær vikur og gefið í eftir að Íranir og Hezbollah gerðu samræmdar og umfangsmiklar árásir á Ísrael á miðvikudag.

Ísraelsher hefur beint þeim tilmælum til íbúa á stóru svæði sem nær til nokkurra borga og fjölda þorpa að flýja heimili sín og halda norður.

Um 800 manns hafa fallið og meira en 850.000 manns hafa þurft að flýja heimili sín, að sögn AP.