Guð­rún á­fram í undanúrslitin með Hammarby

Hammarby vann í kvöld 3-0 heimasigur á Vittsjo en liðið vann þar með riðilinn sinn.

Hin 21 árs gamla Svea Rehnberg kom Hammarby í 1-0 strax á sjöttu mínútu leiksins og bætti síðan við öðru marki sínu á 66. mínútu. Hin sextán ára gamla Fanny Peterson innsiglaði síðan sigurinn í lokin.

Guðrún spilaði allan leikinn í miðri vörn Hammarby.

Efsta liðið í hverjum riðli tryggði sér sæti í undanúrslitum keppninnar. Hammarby tapaði ekki leik og náði í sjö stig af níu mögulegum.

Í undanúrslitunum verða einnig Íslendingaliðin Djurgården, Häcken og Kristianstad sem unnu öll sinn riðil.

Það er því ljóst að íslenskur leikmaður verður bikarmeistari í Svíþjóð í ár.