Spacey sleppur við dóm­salinn með sátt við þrjá menn

Breska ríkisútvarpið greinir frá sáttinni en frekari upplýsingar um hana liggja þó ekki fyrir. Mennirnir sögðu Spacey hafa brotið á sér á árunum 2000 til 2013 en Spacey var listrænn stjórnandi Old Vic-leikhússins í Lundúnum frá 2003 til 2015.

Einn þeirra sem ásakaði Spacey er leikarinn Ruari Cannon, sem afsalaði sér rétti sínum til nafnleysis, gerði sátt við Old Vic-leikhúsið vegna málsins fyrr í þessum mánuði. Hann sakaði Spacey um að hafa brotið á sér í eftirpartýi leikhússins á Savoy-hótelinu og við leikhúsbarinn fleiri en einu sinni. Cannon var hluti af heimildarmyndinni Spacey Unmasked sem Channel 4 og HBO gáfu út 2024.

Sjá einnig: „Mun ekki halla mér aftur og leyfa deyjandi sjónvarpsstöð að ráðast á mig“

Hinir tveir mennirnir eru nafnlausir en sökuðu Spacey um sambærileg brot. Annar þeirra sagði Spacey hafa brotið á honum tólf sinnum frá 2000 til 2005 en hinn sagðist hafa kynnst leikaranum í vinnustofu Old Vic árið 2008 og þolað „andlegan skaða og fjárhagslegt tap“ eftir að Spacey braut á honum. Spacey hefur alla tíð neitað öllum ásökunum mannanna.

Spacey var sýknaður árið 2023 af öllum ákærum um kynferðisbrot gegn fjórum breskum karlmönnum sem sögðu leikarann hafa brotið á þeim með hann var listrænn stjórnandi Old Vic-leikhússins.

Ári áður en Spacey var sýknaður í Lundúnum hafði hann verið sýknaður í New York af ásökunum um að hafa reynt að nauðga leikaranum Anthony Rapp þegar sá síðarnefndi var táningur á tíunda áratug síðustu aldar.

Spacey hefur reynt að byggja upp ferill sinn á ný frá því hann var sýknaður, leikið í smærri myndum og verið gestur á hátíðum víða um heima. Hann sagðist í fyrra vera heimilislaus, búa á hótelum og vera á barmi gjaldþrots. 

Líkti Spacey hlutskipti sínu við leikara sem voru bannaðir úr Hollywood vegna herferðar McCarthy gegn meintum kommúnistum.