Ekið yfir unga stúlku á golfbíl á PGA-móti

Gera þurfti hlé á þriðja keppnisdegi Valspar-mótsins. Á 15. holu Copperhead-vallarins í Flórída var ekið yfir unga stelpu á golfbíl með þeim afleiðingum að hún festist undir honum.

Brooks Koepka var staddur á 15. holunni þegar slysið varð. Hann fór strax og hugaði að stúlkunni. Koepka var sleginn er hann ræddi við fjölmiðla um atvikið.

„Mér fannst þetta bara hræðilegt fyrir hana. Ég held að hún heiti Shay,“ sagði Koepka. Hann kvaðst feginn þegar honum var tjáð að stúlkan hefði ekki slasast.

„Guði sé lof. Það er það eina sem skiptir máli. Ég veit að hún er líklega svolítið hrædd og ég fann til með henni á þessari stundu. Þetta er óheppilegt, þetta hefði ekki átt að gerast en aðalatriðið er að það er í lagi með hana,“ sagði Koepka sem endaði í 18. sæti á mótinu.

Englendingurinn Matt Fitzpatrick hrósaði sigri á Valspar-mótinu en hann lék á samtals ellefu höggum undir pari.