„Þetta eru tveir úr­slita­leikir“

Leikmannahópurinn var tilkynntur á blaðamannafundi HSÍ í gær. Þar leyndist engum hversu mikilvægir þessir tveir leikir væru og landsliðsþjálfarinn, Arnar Pétursson, lítur á þetta sem tvo úrslitaleiki.

„Þetta eru það klárlega… Þetta eru tveir úrslitaleikir en eins og alltaf þá byrjum við á einum leik [gegn Færeyjum 8. apríl],“sagði Arnar og tók fram að sá möguleiki er til staðar að Ísland tapi öðrum hvorum leiknum en komist samt í umspilið.

Frítt verður inn á Ásvelli í seinni leiknum, þegar Ísland tekur á móti Portúgal þann 12. apríl.

„Það gefur okkur alveg ofboðslega mikið ef við fyllum húsið og ég trúi ekki öðru en að það gerist. Það skiptir okkur alveg gríðarlegu máli að fá stuðning. Við höfum fundið það í þessum heimaleikjum uppi á Ásvöllum, í Þjóðarhöllinni okkar, að þegar það er vel mætt þá er það auka innspýting sem gerir ofboðslega mikið fyrir okkur.“

Eitt af spurningamerkjunum varðandi liðsvalið var markmaðurinn Hafdís Renötudottir, hún fékk höfuðhögg í síðasta landsliðsverkefni og hefur ekki spilað síðan. En Hafdís var viðstödd fundinn í gær og væntir þess að vera klár í slaginn þegar að því kemur. Katrín Tinna Jensdóttir hefur sömuleiðis jafnað sig af höfuðhögginu sem hún fékk.

Nokkrir aðrir leikmenn eru þó enn að glíma við meiðsli.

Vinstri hornakonan Dana Björg Guðmundsdóttir meiddist á dögunum og verður frá út tímabilið, miðjumaðurinn Alfa Brá Oddsdóttir Hagalín er að glíma við meiðsli í baki og hægri skyttan Thea Imani Sturludóttir er enn að glíma við tognun í læri. Þá er hægri hornakonan Þórey Anna Ásgeirsdóttir komin í barneignaleyfi.

„Þannig er það bara. Þetta er staðan sem við erum að fást við og ég er búinn að velja mjög sterkan hóp, gott lið, og hlakka til að takast á við verkefnið sem bíða okkar… Það er klárlega markmiðið [að komast inn á EM]. Það væri frábært og við erum auðvitað að stefna þangað. Við erum samt alltaf að horfa á hlutina og frammistöðurnar í heild sinni. En auðvitað dreymir okkur um að komast á fjórða stórmótið í röð.“

TV KLIPPA EMBED 

Fjallað var um komandi leiki hjá stelpunum okkar í Sportpakka Sýnar í gærkvöldi. Innslagið má sjá í spilaranum að ofan. Hér fyrir neðan má svo finna viðtalið við Arnar Pétursson í heild sinni.