Átti að taka víti fyrir Heimi en missti með­vitund

Heimir Hallgrímsson hafði sent Szmodics inná völlinn þegar aðeins fimm mínútur voru eftir af framlengingu, með það í huga að hann tæki víti í vítaspyrnukeppninni sem Írar töpuðu svo.

Szmodics meiddist hins vegar á höfði eftir árekstur við Stephan Chaloupek, og lá eftir á vellinum meðvitundarlaus. Þetta gerðist fyrir framan Heimi sem var fyrstur til að hlaupa að Szmodics og huga að honum.

Sjúkrateymi írska liðsins brást líka skjótt við og var hlé á leiknum í nokkrar mínútur á meðan að hlúð var að honum.

„Sammy var meðvitundarlaus á vellinum en við erum með góða lækna og þeir sáu vel um hann á grasinu,“ sagði Heimir á blaðamannafundi eftir leik.

„Hann er kominn til meðvitundar. Það er bara verið að gera próf og skoða hann en vonandi flýgur hann með okkur heim til Írlands á föstudag,“ sagði Heimir í gærkvöld.

Talsmaður írska knattspyrnusambandsins staðfesti svo að Szmodics hefði í dag verið útskrifaður af sjúkrahúsinu og myndi í kjölfarið jafna sig undir eftirliti sjúkrateymis írska liðsins og Derby County.

Heimir var spurður að því sérstaklega hvort að Szmodics hefði verið skipt inn á til að taka víti í vítakeppninni og játti því. „Við vorum með lista tilbúinn. Sammie var eitt af sex nöfnum,“ sagði Heimir.