Linda Líf með mark og stoðsendingu í fyrsta deildar­leik

Linda Líf hefur farið frábærlega af stað með Kristianstad og skoraði á dögunum í tveimur leikjum í röð í bikarkeppninni, áður en liðið féll svo úr leik í undanúrslitum.

Í dag hófst deildarkeppnin í Svíþjóð og Linda Líf hélt sínu striki, jafnvel rúmlega það því hún bæði skoraði og lagði upp.

Linda tók vel við boltanum á 12. mínútu, sólaði varnarmann og lagði fyrsta mark leiksins upp fyrir Tilda Persson.

Linda var svo sjálf á ferðinni á 41. mínútu og skoraði skallamark sem kom Kristianstad 2-1 yfir eftir jöfnunarmark Pitea. Viktoria Persson átti fyrirgjöfina á Lindu sem beið á fjærstönginni.

Linda var síðan tekin af velli á 82. mínútu fyrir Filippa Andersson Widén, sem skoraði þriðja mark Kristianstad áður en Pitea minnkaði muninn í 3-2 og það urðu lokatölur.

Alexandra Jóhannsdóttir var einnig í byrjunarliði Kristianstad og spilaði allan leikinn. Nik Chamberlain skipti Elísu Lönu Sigurjónsdóttir síðan inn af varamannabekknum á 62. mínútu.

Kristianstad mætir Djurgarden í næstu umferð en svo kemur landsleikjahlé. 

Linda Líf verður nýliði í íslenska landsliðinu sem mætir Úkraínu og Englandi í undankeppni HM. Alexandra Jóhannsdóttir var að vanda valin í hópinn.