Taka loks við reiðu­fé tuttugu mánuðum frá opnun

Í fréttatilkynningu þess efnis frá Prís segir að um sé að ræða svar við kalli viðskiptavina, sem hafi saknað þess að geta greitt með reiðufé. Með breyttri áherslu sé aðgengi viðskiptavina með ólíkar þarfir einnig bætt.

„Frá því að Prís opnaði höfum við orðið þess áskynja að viðskiptavinir okkar sakna þess að geta ekki greitt með reiðufé. Hugmyndin með að vera eingöngu með sjálfsafgreiðslukassa var að spara í yfirbyggingu því allt hjá okkur gengur út á það að bjóða lægsta verðið en á sama tíma þá er það alltaf mikilvægt að eiga í góðu samtali við viðskiptavini, hlusta á óskir þeirra og þetta er í raun viðbragð við eindregnum óskum þeirra,“ er haft eftir Hildi Scheving, markaðsstjóra Príss.

Til þess að geta tekið við reiðufé hafi verið settir upp tveir beltakassar í versluninni þar sem starfsmaður muni nú þjónusta og afgreiða viðskiptavini.

„Þetta snýst ekki bara um að geta greitt með reiðufé heldur einnig að tryggja jafnt aðgengi fólks með ólíkar þarfir. Svo finnst sumum einfaldlega þægilegra að horfa beint í augun á starfsmanni og láta skanna inn fyrir sig,“ er haft eftir Hildi.