Forvarnarsamtök fagna en vínsalar láta dóminn ekki stoppa sig

Vilhjálmur Forberg Ólafsson, forsvarsmaður áfengisnetverslunarinnar Smáríkisins, varð í dag fyrstur til að hljóta dóm fyrir að selja áfengi á netinu, með því fyrirkomulagi sem fjöldi netverslana með áfengi hafa notað undanfarin ár.

Vilja að stjórnvöld standi með lýðheilsustefnu

Vilhjálmur var ekki viðstaddur dómsuppsöguna en það voru fulltrúar forvarnarsamtaka og annarra netverslana með áfengi. Forvarnarsamtökin Fræðsla og forvarnir – félag áhugafólks um forvarnir og heilsueflingu, Foreldrasamtök gegn áfengisauglýsingum, IOGT á Íslandi og SAFF - samstarf félagasamtaka í forvörnum hafa sent frá sér yfirlýsingu vegna dómsins, þar sem niðurstöðu hans er fagnað.

„Samtökin hafa lagt vinnu í að upplýsa almenning um stöðu áfengismála í langan tíma. Þau hafa verið í góðri samvinnu við heilbrigðisstéttir og SÁÁ í málinu. Samtökin treysta því að stjórnvöld muni standa með gildandi lýðheilsustefnu samþykktri á Alþingi, tilmælum og áfengisforvarnaáætlun Alþjóðaheilbrigðismálastofnunarinnar, gagnreyndum lýðheilsurannsóknum og ályktunum heilbrigðisstétta og forvarnar- og foreldrasamtaka,“ segir í yfirlýsingunni.

Ósammála dóminum og halda ótrauðir áfram

Arnar Sigurðsson og Elías Blöndal Guðjónsson, eigendur netverslunarinnar Santé, voru viðstaddir dómsuppsöguna í dag enda hafa þeir fylgst grannt með gangi málsins á hendur Vilhjálmi. Þeir sendu tölvubréf á viðskiptavinu Santé skömmu eftir dómsuppsögu, þar sem þeir segjast ósammála niðurstöðunni og að málinu verði áfrýjað.

„En þessi dómur breytir litlu um heildarmyndina. Við hjá Santé höfum barist fyrir sjálfsákvörðunarrétti neytenda í áratug og þetta er aðeins einn liður í þeirri baráttu.“

Staðan sé skýr þar sem fleiri en 100.000 Íslendingar hafi þegar greitt atkvæði með veskinu og valið frjálsa verslun. ESA hafi gert athugasemdir í sjö liðum um að íslenska einokunin standist ekki EES-rétt og það sem skipti mestu, frumvarp um að leyfa netverslun með áfengi, liggi þegar fyrir Alþingi og fari í atkvæðagreiðslu og meirihluti þingmanna sé hlynntur samþykkt þess.

„Við ætlum ekki að láta einn dóm stoppa okkur. Santé heldur áfram að berjast fyrir sjálfsákvörðunarrétti neytenda og atvinnufrelsi á Íslandi. Við skálum að leikslokum.“