Mann­leg mis­tök inni­falin og karfan góð og gild

Keflavík komst tveimur stigum yfir þegar 0,4 sekúndur voru eftir og Valsmenn tóku þá leikhlé. Tíminn dugði svo til þess að Kári fengi boltann í hendurnar, næði að kasta og skora þriggja stiga sigurkörfu.

Daníel Guðni Guðmundsson, þjálfari Keflavíkur, kvaðst þess fullviss að það væri einfaldlega ekki mögulegt að skora með þessum hætti á svo skömmum tíma. „Ég upp­lifi þetta sem al­gjöra þvælu,“ sagði hann og taldi um hreint og klárt rán að ræða.

Mikið hefur verið rætt og ritað um hvort karfa Kára hafi í raun verið gild og reyndi Davíð Tómas að útskýra fyrir fólki, út frá reglum körfuboltans, að svo hefði verið.

Davíð segir viðmiðin þau að á 0,3+ sekúndum sé mögulegt að grípa og skjóta boltanum. Séu aðeins 0,2 sekúndur eða minna eftir þá sé í mesta lagi hægt að blaka eða troða boltanum ofan í eftir innkast í átt að körfuhringnum.

Eðlilegt að ná ekki að setja tímann strax af stað

Þá bendir Davíð á þá staðreynd að fólkið á ritaraborðinu sér um að setja tímann af stað, þegar leikmaður fær boltann í hendurnar:

„Inn í þessu mengi er „human error”, það er að það eru eðlileg viðbrögð að geta ekki sett tímann af stað akkúrat á þessu mómenti. 0,3 getur því orðið 0,4-0,6 þess vegna,“ skrifaði Davíð á Bónus-spjallinu á Facebook.

Myndband sem körfuboltaþjálfarinn Hrafn Kristjánsson birti virðist svo renna stoðum undir það að ekki hafi meira en 0,4 sekúndur liðið frá því að Kári snerti boltann fyrst og þar til að hann hafði kastað honum frá sér.

Greining Davíðs afdráttarlaus

Davíð ítrekaði svo í athugasemd að FIBA gerði ráð fyrir því að á ritaraborðinu þyrfti fólk tíma til að ýta á takka:

„Ég er a ritaraborðinu. Ég þarf að sjá Kára grípa hann. Senda boð úr heilanum mínum að ýta puttanum mínum á takka. Þetta er 0.1-0.4 þess vegna. Innifalið hjá FIBA er „human error“.

Í flestum tilfellum í mínum Evrópuleikjum hafa þeir sem eru á ritaraborðinu verið 50+. Sumir 60+. Heilinn og viðbrögð oft lengur að virka þá.

Mín greining: Basket counts,“ skrifaði Davíð.