Sigurður fór hringinn á tíu höggum undir pari

Sigurður byrjaði hringinn á tíundu holu Sand Valley Golf Resort og fór af stað af krafti, með þrjá fugla og örn á fyrstu sex holum hringsins. Á sautjándu holunni bætti hann einum fugli við og lék seinni níu holurnar því á 30 höggum, sex undir pari.

Eftir tvö pör á næstu tveimur holum fóru fuglarnir að hrannast inn á ný. Þrír fuglar í röð duttu á holum þrjú, fjögur og fimm, og Sigurður kominn níu undir par eftir fjórtán holur.

Fugl á áttundu holunni kom Sigurði tíu undir par og par á síðustu holu dagsins fullkomnaði þennan magnaða hring.

Með árangrinum flýgur Sigurður upp stöðutöfluna. Fyrir hringinn var hann jafn í 30. sæti en Sigurður er nú jafn í fjórða sæti mótsins.

Stór hópur íslenskra afrekskylfinga eru einnig á meðal keppenda mótsins, sem er hluti af Nordic Golf League mótaröðinni sem er sú þriðja sterkasta í Evrópu. Íslensku kylfingarnir eru:

• Aron Snær Júlíusson, GKG
• Dagbjartur Sigurbrandsson, GR
• Daníel Ísak Steinarsson, GK
• Hlynur Bergsson, GKG
• Logi Sigurðsson, GS
• Sigurður Arnar Garðarsson, GKG
• Skúli Gunnar Ágústsson, GKG

Aron Snær lék fyrsta hringinn á 71 höggi, en Dagbjartur, Skúli og Logi léku hann allir á 72 höggum. Hlynur lék á 74 höggum og Daníel Ísak kom í hús á 79 höggum.

Nánar má lesa um mótið á heimasíðu Golfsambands Íslands.