Benedict snýr aftur í Þjóð­leik­húsið og Óresteia í út­rás

Þetta staðfestir Magnús Geir Þórðarson Þjóðleikhússtjóri sem er nýjasti gestur Símonar Birgissonar í hlaðvarpinu Menningarvaktinni. Í þættinum fóru þeir Símon og Magnús í gegnum leikhúsveturinn í Þjóðleikhúsinu, hvað stóð upp úr, hvaða áskoranir mættu leikhúsinu og hvað gerðist á bak við tjöldin.

„Það fór ekkert milli mála að hann brann fyrir þetta verk,“ sagði Magnús þegar talið barst að gríska harmleiknum Óresteiu sem er upprunalega þríleikur leikrita eftir leikritaskáldið Æskýlos. 

„Við vorum sammála um að skrifa þyrfti nýja útgáfu og svo snemma í ferlinu fórum við að ræða um aðferðafræði. Ég velti því upp hvort væri sniðugt að gera þetta í meira návígi heldur en að gera þetta á stóra sviðinu. Þetta var hugmynd sem Benedict var skotinn í og þetta konsept, að gera stórsýningu á litlu sviði, fæddist,“ sagði hann. 

Símon spurði hvort það hefði einhvern tímann verið í myndinni að Benedict myndi setja upp Shakespeare-verk en sýningar hans á Lé konungi og Macbeth vöktu mikla athygli á sínum tíma.

„Það var ýmislegt rætt en þetta varð lendingin. Það var ákveðið að þetta yrði jólasýningin og í Kassanum - sem var fyrsta skiptið sem það er gert. Og við ákváðum að leggja allt undir. Hann fengi fullt listrænt frelsi og engar hömlur,“ segir Magnús Geir.

„Ef þú hefðir reynt að selja þetta konsept fyrirfram - jólasýning í Kassanum, fjórir tímar að lengd og fullt af blóði. Ég veit ekki hversu vel sú söluræða hefði gengið,“ sagði Símon.

„Enda voru nokkrir sem hváðu. En þetta reyndist vera rétt og þetta gengur allt saman upp. Það er návígið við leikarana og að ganga svona langt á allan hátt. Það eru engar málamiðlanir.“

Leikarar losaðir úr öðrum sýningum vegna álags

Símon spurði út í sviðsmyndina sem er listaverk í sjálfu sér eftir Elínu Hansdóttur. „Eitt sem gengur langt er sviðsmyndin. Maður nánast vorkenndi leikurunum að horfa á þá lemstraða og plástraða á þessum gifshellum. Maður heyrði að það hefðu komið alls kyns áskoranir upp varðandi það,“ sagði Símon.

„Við vissum svo sem að það myndi gerast. Og það er hluti af galdrinum hvað hún er krefjandi, fyrir áhorfendur og leikara. Þau stafla þessum hellum og þær brotna og það þarf nýjar hellur,“ svaraði Magnús.

„Það kom einmitt upp umræða um álag á leikara. Það eru leikarar sem eru að hoppa á milli stórsýninga sem allar eru að fá góða aðsókn. Þetta er kannski jákvætt álag en var þetta of mikið af hinu góða? Það verða til dæmis meiðsli hjá leikurum. Ef þú horfir til baka, var þetta of mikið álag?“ spurði Símon þá.

„Staðreyndin er að það hefur gengið vel í vetur. Við gerum áætlanir um sýningartíma. Í vetur hefur gengið betur en áætlanir gerðu ráð fyrir og margar sýningar en við höfum augu á vinnuvernd leikara, samningum og að hafa þetta í réttu jafnvægi. Við breyttum og lengdum sýningartíma Óresteiu þegar varð ljós að sýningin fékk ekki bara góða dóma heldur seldist á hana eins og vinsælasta söngleik. En til að framlengja sýningartímabilið þurfti að fresta einni frumsýningu [Nýtt eldhús eftir máli eftir Friðgeir Einarsson]. Þannig náðum við að teygja út sýningartímabilið og mæta eftirspurn.“

Sumt í umræðunni um álagið í Þjóðleikhúsinu hefði ekki verið alveg rétt.

„Í tilviki Óresteiu sáum við fram á hversu mikið álag þetta yrði og losuðum leikara út úr öðrum sýningum. Það var því ekki rétt að leikarar væru í Línu langsokk og Óresteiu á sama tíma eins og kom fram í þessu hlaðvarpi. Ebba fékk frí úr Línu. Við erum að sjálfsögðu með augun á þessu öllu. Það var tímabil þegar leikarar voru að sýna fjórar sýningar af Ormstungu og tvær af Línu í sömu viku og það er auðvitað mjög mikið,“ sagði Magnús.

„Áður en við sleppum takinu af Óresteiu. Hvenær fáum við næsta verk eftir Benedict Andrews og hvert verður framhald Óresteiunnar. Er þessi sýning farin að vekja athygli utan landsteinana?“ spurði Símon að lokum.

„Svarið við báðum spurningum er já. Það er mjög mikill áhugi á sýningunni erlendis frá og margir skoðað hana. Ekkert sem ég get staðfest en þori að segja að það eru mjög miklar líkur á að sýningin sé að fara á leiklistarhátíðir erlendis sem eru fremstar í flokki slíkra hátíða. Það eru alls kyns praktísk mál sem þarf að útfæra en vonandi tekst okkur að landa þessu. Það er sannarlega áhugi á henni frá mörgum þessum hátíðum. Og svo er Bendict að vinna að nýrri sýningu sem verður frumsýnd haustið 2027,“ svaraði Magnús Geir.

„Verður það Shakespeare?“

„Ég get ekki sagt það núna hvert verkið verður en get staðfest að hann er að vinna að nýrri sýningu með okkur.“

Hlusta má á viðtalið við Magnús Geir í heild sinni í nýjasta þætti hlaðvarpsins Menningarvaktin á Tal og öllum helstu streymisveitum.