Yfir­lýsing Icelandair kom flatt upp á flug­menn

„Þetta kom flatt upp á okkur, það er mikilvægt að menn geri skýran greinarmun á því hvað eru verkfallsaðgerðir og því að fólk hafi ekki tök á því að hlaupa til vinnu úr fríi eða orlofi. Fólk á rétt á slíku samkvæmt kjarasamning,“ segir Jón Þór í samtali við Vísi. Þrjár áætlunarferðir Icelandair hafa tafist eða þær verið felldar niður vegna skorts á áhafnarmeðlimum, síðast var ferð til Brussel seinkað í morgun.

Í yfirlýsingu Icelandair frá því síðdegis segir meðal annars að þvert á fullyrðingar FÍA bendi margt til þess að um óformlegar aðgerðir sé að ræða, eftir nánari skoðun flugfélagsins. Vísbendingar séu um samantekin ráð og kallar Bogi Nils Bogason forstjóri félagsins eftir því að allir aðilar sýni ábyrgð.

Til marks um álag en ekki aðgerðir

Jón Þór segir af og frá að félagið sé í óformlegum verkfallsaðgerðum. Félagið hafi um árabil varað við því að viðvarandi ástand líkt og nú gæti komið upp vegna gríðarlegs álags á hóp flugmanna.

„Þegar álagið er svo mikið þá er hætt við því að þessi sveigjanleiki, sem er sennilega það verðmætasta sem við hjá Icelandair eigum, að hann verði ekki eins aðgengilegur og áður hefur verið,“ segir Jón Þór. Hann hafnar fullyrðingum Boga um að kröfur flugmanna séu óraunhæfar og segir félagið ganga til viðræðna við félagið á morgun um nýjan kjarasamning með opnum huga.

„Þetta rekur engan fleyg í þær viðræður af okkar hálfu. Verkefnið fer ekkert frá okkur þrátt fyrir þessa yfirlýsingu,“ segir Jón Þór. Hann segir samband sitt og Boga alltaf hafa verið gott og segir leitt að hann hafi ekki heyrt í sér.

„Það hefur alltaf verið stutt á milli okkar og gott í spjalli. Mönnum getur hitnað í hamsi en við erum alltaf tilbúnir til að tala saman og að tala við Boga ef hann vill.“