Stjórn Icelandair með fullt traust til Boga

Viðskiptablaðið segir stjórn Icelandair samstíga í viðbrögðum vegna kjaradeilna við flugmenn félagsins, en Bogi Nils hefur sagt að aflýsingar á áætlunarferðum Icelandair vegna áhafnarskorts séu tilkomnar vegna samstilltra aðgerða flugmanna.

Því hafa flugmenn neitað heldur segja þessar aflýsingar alfarið á ábyrgð Icelandair sem ætli sér að treysta á að halda flugáætlun með því að kaupa frídaga af flugmönnum. Icelandair segir hins vegar ríka hefð fyrir sölu frídaga og það sé hluti af kjarasamningum flugmanna. Flugmenn hafi síðast hafnað sölu frídaga árið 2014, þegar þeir voru í kjaradeilu við Icelandair.

Guðmundur segir í samtali við Vísi að stjórnin vonist til að farsæl lausn finnist á kjaradeilu Icelandair og flugmanna. Þá segir Guðmundur að traustið til Boga sé einnig gagnvart öðrum verkefnum sem félagið standi frammi fyrir. Það séu einnig miklar áskoranir vegna hækkunar olíuverðs.

„Og við vitum að þau eru að vinna ötullega að þessu og treystum þeim til að sinna þeim verkefnum,“ segir Guðmundur.

Viðskiptablaðið segir mikla óánægju hjá hluthöfum vegna stöðunnar sem er uppi vegna flugmanna. Heimildir blaðsins herma að hluthafar, líkt og forstjórinn, telji flugmenn vera í samstilltum aðgerðum og það sé skýrt brot á kjarasamningi. Þá segist Viðskiptablaðið einnig hafa heimildir fyrir því að hluthafar skoði grundvallarbreytingu á rekstri Icelandair í ljósi stöðunnar vegna flugmanna.

Ein leiðin væri að sögn Viðskiptablaðsins að sameina félagið við erlent flugfélag, önnur leiðin væri að flytja allan rekstur félagsins út fyrir landsteinana og sú þriðja væri að leysa félagið upp.

Guðmundur segist í samtali ekki hafa heyrt af slíkri umræðu meðal hluthafa og því ekki í stöðu til að tjá sig um slíkt.

Samninganefndir Icelandair og Félags íslenskra atvinnuflugmanna funduðu hjá ríkissáttasemjara í gær og aftur í dag. Vinnufyrirkomulag flugmanna hefur verið þar til umræðu, þar á meðal vinnuframlag og skipulagning vinnu með tilliti til vakta og frídaga.