Gafst aldrei upp þrátt fyrir á­fallið en komst ekki á heimsleikana

Bergrós hefur stimplað sig inn meðal þeirra bestu í CrossFit-heiminum á þessu tímabili með góðri frammistöðu í opna hlutanum og fjórðungsúrslitunum. Hún ætlaði sér því stóra hluti og að komast á heimsleikana í fullorðinsflokki í fyrsta sinn. Bergrós hefur áður náð að komast á verðlaunapall í unglingaflokki á heimsleikunum.

Bergrós hefði þurft að ná einu af þremur efstu sætunum á þessu móti til að komast á heimsleikana í haust en varð á endanum að sætta sig við níunda sætið. Hún var þó ekki langt á eftir þeim sem enduðu í sætunum fyrir ofan.

Bergrós varð fyrir miklu áfalli eftir fyrstu grein helgarinnar en að hennar sögn var um að ræða eina bestu frammistöðu hennar á ferlinum.

„Það sem fylgdi hins vegar í kjölfarið var ein af ógnvænlegustu stundum lífs míns,“ skrifaði Bergrós í færslu á Instagram.

„Til að gera langa sögu stutta gat ég hvorki gengið né talað um tíma. Blóðsykurinn minn sem og blóðþrýstingurinn mældist allt of lágur og ég missti meðvitund um stund.“

Flytja þurfti Bergrósu á nærliggjandi sjúkrahús og þótti ekki tilefni til frekara inngrips þegar þangað var komið.

Hún gafst samt ekki upp og var enn með í baráttunni fyrir lokadaginn eftir að hafa sýnt mikla þrautseigju í næstu greinum eftir þetta áfall.

„Margt hefur ekki gengið mér í haginn um helgina, en einhvern veginn er ég enn í baráttunni um sæti á leikunum. Ég tek þessu tækifæri alls ekki sem sjálfsögðum hlut. Það er kominn tími til að leggja allt í sölurnar,“ skrifaði Bergós.

Hún endaði með 460 stig, aðeins tveimur stigum frá áttunda sætinu, sex stigum frá sjöunda sætinu og 61 stigi frá heimsleikasæti. Guðbjörg Valdimarsdóttir varð í 19. sæti með 358 stig. Þær sem komust á heimsleikana voru Gabriela Migala frá Póllandi, Lucy McGonigle frá Írlandi og Ella Wilkinsson frá Bretlandi.

Bestum árangri Íslendinga á mótinu náði Haraldur Holgersson sem varð í áttunda sæti hjá körlunum. Hann var einu sæti á undan Bergrós en vissulega fleiri stigum frá takmarkinu. Haraldur var tólf stigum frá sjöunda sætinu og 78 stigum frá sæti sem gaf þátttökurétt á heimsleikunum.