Íranir skjóta á Ísrael

Frá þessu greinir Times of Israel en Ísraelsher greindi einnig frá þessu í yfirlýsingu um klukkan 19 að íslenskum tíma. Herinn segist hafa skotið niður allar skotflaugarnar í fyrstu bylgju árásanna, en fleiri eldflaugar séu á leiðinni.

Fyrr í dag hafði ísraelski herinn sagst vera að búa sig undir eldflaugaárás frá Íran á komandi klukkustundum, í kjölfar árásar sem Ísraelsmenn höfðu gert í líbönsku höfuðborginni Beirút fyrr í dag.

Muni ekki umbera brot á vopnahléi

Times of Israel skrifa nú að loftvarnarsírenur ómi víða um Ísrael. Þar segir að engar fregnir hafi borist af mannsfalli eða áverkum á fólki vegna árásanna. 

Þetta er fyrsta árás Írana á Ísrael frá því að vopnahlé tók gildi 10. apríl. 

Íranski byltingarvörðurinn hefur birt yfirlýsingu þar sem fram kemur að ef Ísraelar hætti ekki að ráðast á Líbanon, muni þeir gera stærri áras.

Mohzen Rzaee, fyrrverandi yfirmaður byltingarvarðarins og ráðgjafi æðstaklerksins, skrifar á X að Íranir hafi ítrekað lýst því yfir að þeir myndu ekki umbera brot á vopnahléi eða árásir á Líbanon. „Í kvöld fengu árásaraðilarnir sitt svar. Þetta er viðvörun til þeirra um að hætta sínum illgjörðum; sérhver ný aðgerð mun mæta harðari viðbrögðum og meiri kostnaði,“ skrifar hann.

Þetta myndband sem var tekið í íran sýnir eldflaugum skotið að Ísrael.

Íranska höfuðborgin „mun brenna“

Ísraelsmenn heita hefndum. 

„Í kvöld mun Teheran brenna,“ skrifar Ben-Gvir, þjóðaröryggisráðherra Ísraels, á X og vísar þar til höfuðborgar Írans.

Á miðvikudag höfðu borist af því fréttir að stjórnvöld í Ísrael og Líbanon hefðu samþykkt að koma á vopnahléi í nokkrum viðræðulotum. Samkvæmt fyrsta samkomulagi þurfti Hezbollah, sem stýrir stórum hluta Suður-Líbanons, að hætta öllum árásum á Ísrael og flytja alla liðsmenn sína frá suðurhluta Líbanons. Þessu höfnuðu Hezbollah.

Trump: Ekki sáttur við árás Ísraels í Beirút

Trey Yingst, blaðamaður Fox News í Ísrael, kveðst hafa rætt við Donald Trump Bandaríkjaforseta um árásir Írana á Ísrael, en einnig árásir Ísraelsmanna á Beirút.

Haft er eftir Trump að árásirnar eigi ekki eftir að hjálpa við friðarviðræður. 

„Það sem ég myndi leggja til við Íran: Þið eruð búnir að skjóta ykkar eldflaugum. Þetta er nóg. Komið aftur að borðinu og semjið,“ mun Trump hafa sagt.

Spurður út í árásir Ísraels á Líbanon mun svaraði Trump: „Ég er ekki ánægður með það.“

 Fréttin hefur verið uppfærð.