Finnst sturlað að Watergate hafi fellt Nixon

Ummælin lét J.D. Vance, varaforseti Bandaríkjanna, falla á bókakynningu fyrir nýja bók hans í forsetabókasafni Richard Nixon í gær. Nixon sagði af sér embætti forseta árið 1974 vegna Watergate-málsins svonefnda.

Sagði Vance að Nixon væri að fá uppreist æru á síðari árum og að það væri verðskuldað.

„Ef Watergate ætti sér stað á morgun væri það fréttamál í tólf klukkustundir. Hugmyndin um að það gæti tekið niður forseta er klikkuð,“ sagði Vance.

Nixon sagði af sér vegna tilrauna sinna til þess að hylma yfir eigin hlutdeild og embættismanna hans í innbroti á skrifstofum Demókrataflokksins í Watergate-byggingunni í Washington-borg. Innbrotsþjófarnir, sem voru á vegum endurkjörsnefndar Nixon, komu fyrir hlerunarbúnaði á skrifstofunni en voru gripnir glóðvolgir.

Í framhaldinu kom í ljós að undirsátar Nixon njósuðu og skemmdu fyrir andstæðingum og notuðu til þess fjármuni frá endurkjörsnefnd forsetans.

Forsetinn og undirsátar hans lugu um aðild þeirra að innbrotinu, eyddu sönnunargögnum og mútuðu innbrotsþjófunum til þess að þegja. Þá rak Nixon sérstakan saksóknara sem rannsakaði Watergate-málið.

Sama „djúpríki“ reynt að taka niður Trump

Vance hélt áfram og sagði Nixon hafa verið fórnarlamb „djúpríkisins“ á svipaðan hátt og gerðist á fyrra kjörtímabili Donalds Trump. „Djúpríki“  er samsæriskenning sem gengur út á að embættismannakerfi og samkrull spilltra afla stjórni öllu á bak við tjöldin.

„Það er hliðstæða þarna á milli,“ sagði Vance og fullyrti að „sama fólk og stofnanir og tóku niður Nixon“ hefðu reynt að gera það sama við Trump.

Óljóst er hvað Vance átti við þar. Bandaríkjaþing kærði Trump í tvígang fyrir embættisbrot á fyrra kjörtímabili hans en öldungadeild þess sýknaði hann í bæði skipti. Nixon sagði af sér áður en þingnefnd gat gefið út kæru á hendur honum.

Almennt er talið að þáverandi aðstoðarforstjóri alríkislögreglunnar FBI hafi verið einn helsti heimildarmaður Washington Post-blaðamanna sem voru leiðandi í fjölmiðlaumfjöllun sem hélt lífi í hneykslismálinu.