Full­viss að mögu­leg félagaskipti Ander­son trufli hann ekki

Anderson er sagður vera á barmi þess að ganga til liðs við Englandsmeistara Manchester City frá Nottingham Forest, en samningaviðræður hafa staðið yfir á meðan heimsmeistaramótið fer fram.

„Raunin er sú að félagaskipti eru í gangi á meðan við erum að spila,“ segir Tuchel á blaðamannafundi. Hann lagði þó áherslu á að slíkt væri orðið eðlilegur hluti af nútímafótbolta og að leikmenn þyrftu að geta tekist á við það.

Þjálfarinn sagðist ekki hafa orðið var við neina truflun hjá Anderson, sem hafi æft af fullum krafti og sýnt mikinn metnað frá upphafi mótsins.

„Ég sé engan mun á honum. Hann er einbeittur, jákvæður og algjörlega með hugann við verkefnið með enska landsliðinu,“ sagði Tuchel.

England mætir Panama í lokaleik sínum í riðlakeppninni síðar í dag og gæti Anderson fengið tækifæri í byrjunarliðinu.