Sögu­legur leikur fyrir Mosfellinga

Töluvert er síðan að Breiðablik tryggði sæti sitt í bikarúrslitunum með sigri á Víkingi í Kópavogi og beðið hefur verið eftir því að fá að vita hver andstæðingurinn verður. Sama hvað er ljóst að Lengjudeildarlið verður í úrslitunum því efstu tvö lið B-deildarinnar eigast við í Árbænum í kvöld.

„Bikarinn er búinn að vera bara einn leikur í mánuði frá því við byrjuðum á móti ÍR í Egilshöll í mars. Við höfum gert vel að hafa augun á boltanum í deildinni og verið á góðu skriði þar. Ég er ánægður með taktinn í liðinu að undanförnu og ég er spenntur að mæta góðu Fylkisliði í kvöld,“ segir Magnús Már í samtali við Vísi.

Það er sögulegt fyrir Mosfellinga að komast í undanúrslitin.

„Við höfum aldrei farið áður í undanúrslit í bikarnum. Það er ný upplifun fyrir okkur og mjög spennandi. Það er mikil stemning í bæjarfélaginu, hjá stuðningsmönnum og í liðinu að takast á við þetta,“ segir Magnús og bætir við:

„Fylkir er með mjög öflugt lið og með reyndan og góðan þjálfara. Við þurfum að vera á okkar besta degi til að ná markmiðinu um að komast í úrslitaleikinn.“

Það má því búast við því að stuðningsfólk fjölmenni í Árbæinn á leik kvöldsins sem hefst klukkan 19:30.

„Það verður upphitun á Ásláki frá klukkan hálf fimm og mikið húllumhæ. Svo er rútuferð í Árbæinn. Þetta verður mjög skemmtilegt og mikil stemning hjá stuðningsmönnum. Maður finnur meðbyr og það er mikilvægt fyrir okkur að fá alvöru stuðning úr stúkunni. Mosfellingar hafa staðið sig vel í því í stórleikjum undanfarin ár og ég hef engar áhyggjur af öðru en að það verði raunin í kvöld.“