Ógnandi, vopnaður hnífi og í annar­legu á­standi

Alls voru fjórir vistaðir í fangageymslu lögreglunnar á höfuðborgarsvæðinu klukkan fimm í morgun samkvæmt dagbók lögreglu. 

Lögreglan á varðsvæði eitt, sem nær yfir vesturhluta borgarinnar og Seltjarnarnes, hafði afskipti af óvelkomnum einstaklingi sem var vísað á brott úr mathöll. Sá gekk leiðar sinnar. Þá var annar óvelkominn gestur á matsölustað sem lögregla þurfti að vísa út. 

Á varðsvæði tvö sem sinnir verkefnum í Hafnarfirði, Garðabæ og á Álftanesi þurfti einnig aðstoð lögreglu við að vísa óvelkomnum einstaklingi úr fjölbýlishúsi.

Lögreglan hafði þá töluverð afskipti af ökumönnum sem óku of hratt eða voru taldir vera í óhæfu ástandi fyrir akstur. Á varðsvæði tvö var ökumaður stöðvaður fyrir að aka á 123 km/klst á götu þar sem hámarkshraðinn er 80 km/klst. Þess er getið að ökumaðurinn hafði verið með ökuréttindi í sólarhring.

Óskað var eftir aðstoð lögreglunnar á varðsvæði þrjú, Kópavogi og Breiðholti, vegna ökumanns sem var talinn vera í annarlegu ástandi og ók næstum því á önnur ökutæki. Sá var handtekinn grunaður um að aka undir áhrifum ávana- og fíkniefna, lyfja og áfengis. Sömuleiðis reyndist hann sviptur ökuréttindum og hafði gerst brotlegur við vopnalög.

Ökumaðurinn var vistaður í fangaklefa og er málið til rannsóknar hjá lögreglunni.