Meiri­hluti stjórnar Rúv vill snið­ganga Euro­vision

Rúv greinir fyrst frá en ákvörðunin var tekin á fundi stjórnar í dag. Stjórnarmeðlimurinn Diljá Ámundadóttir Zoëga deildi bókun af fundinum á Facebook-síðu sinni en þar kemur meðal annars fram:

„… beina undirritaðir stjórnarmenn því til útvarpsstjóra að hann tilkynni EBU að Ríkisútvarpið taki ekki þátt í Eurovision árið 2027 nema Ísrael verði meinuð þátttaka í keppninni. Fyrri áskorun til EBU um að Ísrael verði vísað úr keppninni er ítrekuð og þess óskað að útvarpsstjóri komi þeirri ítrekun á framfæri.“

Þá greinir hún frá því að sex af níu stjórnarmeðlimum hafi lagt bókunina fram. 

Stefán Jón Hafstein formaður stjórnarinnar segir þau sex sem hafi verið sammála um að vilja sniðganga keppnina hafi viljað greina sem fyrst frá ákvörðuninni en að afstaða stjórnar sé í raun óbreytt frá því í fyrra.

„Við vorum einhuga um það að engar breytingar hefðu orðið sem réttlættu það að skipta um skoðun og mér fannst rétt að skýra frá því strax að þetta væri stefnan hjá okkur,“ segir hann í samtali við fréttastofu og bætir við „vegna þess að það hafði verið svolítið gengið eftir því af fjölmiðlum og áhugamönnum hvað við ætluðum að gera og þá var hreinlegast að gera hreint fyrir sínum dyrum strax og segja að okkar mati hefur engin eðlisbreyting orðið á.“

„Þar til annað kemur í ljós“

Hann segir bókunina þýða að meirihluti stjórnar hafi greitt atkvæði um að fela útvarpsstjóra, Stefáni Eiríkssyni, að tilkynna EBU að Rúv verði ekki með í þetta skiptið.

„Já, já, þetta er bara ákveðið og eins og maður segir alltaf í lífinu af því maður er orðinn gamall reyndar: „þar til annað kemur í ljós“, en það er ekkert annað komið í ljós að mínu mati.“

Stefán segir það eina sem hafa breyst frá því í fyrra vera að ástandið hafi versnað en að þrátt fyrir bókunina þá þýði þetta ekki að Ísland taki ekki þátt í Eurovision nokkurn tímann á ný.

„Ég segi það alveg fullum fetum að ef Ísrael er ekki þátttakandi þá myndum við alltaf endurskoða okkar afstöðu, tel ég. Ég myndi ekki tala fyrir hönd níu manna stjórnar en ég tel að þá myndum við endurskoða okkar afstöðu því að þetta er aðalatriðið í okkar máli,“ segir hann jafnframt.

Ekkert útilokað

Eurovision mun fara fram í Búlgaríu á næsta ári eftir sigur Búlgara í keppninni í ár en fyrr í haust var greint frá nýjum reglum í keppninni. Nýjar reglur kveða á um að sigurþjóðir geti misst rétt til að halda keppnina ef vopnuð átök eiga sér stað í landinu.

Liggur fyrir hvort Söngvakeppnin verði haldin hérna heima?

„Það kom fram í umræðum á fundinum að það að taka ekki þátt í Eurovision útilokaði alls ekki að halda Söngvakeppni Íslands,“ segir Stefán en segir að ákvörðun um það muni líklegast ekki liggja fyrir næstu vikur.

„Það mun væntanlega verða ákveðið fyrir áramót og mun ekki liggja fyrir fyrr en við erum búin að afgreiða fjárhagsáætlun næsta árs,“ útskýrir hann og bætir við að það sé ekki stjórnin sem taki lokaákvörðun um Söngvakeppnina.

„Það stendur í starfsreglum stjórnar að allar óvenjulegar, meiriháttar og sérstakar ákvarðanir séu teknar af stjórn,“ segir hann og ítrekar „þetta er svo sannarlega slíkt.“

Ákvörðunin um Söngvakeppnina sé aftur á móti í höndum útvarpsstjóra.

Fréttin var uppfærð eftir viðtal við formann stjórnarinnar.