Borga hálfan milljarð í við­bót fyrir ind­verskt fé­lag

Frá þessu er greint í kauphallartilkynningu, en þegar Hampiðjan keypti 75,1 prósenta hlut í Kohinoor í byrjun árs 2025 var samið um að seljendur gætu fengið aukagreiðslu ef reksturinn gengi vel á fyrstu tveimur árunum.

Upprunalega kaupverðið nam um 3,15 milljörðum króna og byggðist það meðal annars á hagnaði fyrir afskriftir og fjármagnsliði (EBITDA) rekstrarársins 2024, en þar er miðað við tímabilið 1. apríl 2023 til 31. mars 2024, þar sem rekstrarár á Indlandi fylgir ekki almanaksárinu.

Í samningnum kom einnig fram að ef samanlögð EBITDA fyrir 2025 og 2026 færi yfir 9,97 milljónir evra myndi Hampiðjan greiða seljendum viðbótargreiðslu. Það rættist, samkvæmt tilkynningunni, og hefur félagið því greitt 4,14 milljónir evra til viðbótar sem nemur því um 569 milljónum íslenskra króna. Þar af nam EBIDTA rekstrarársins 2026 um 6,2 milljónum evra (850 m.kr.) sem er tæplega 70 prósent meira en lagt var upp með við kaupin. 

Í tilkynningunni segir að Kahoor hafi styrkt stöðu sína á lykilmörkuðum og sé orðið mikilvæg framleiðslueining fyrir önnur fyrirtæki í samstæðu Hampiðjunnar.

Í tilkynningu Hampiðjunnar er einnig greint frá uppbyggingarverkefnum sem félagið hyggst ráðast í á Indlandi. Á næstu vikum verður fyrsta stóra framleiðsluhúsið tekið í notkun á iðnaðarsvæðinu Auric, austan við Aurangabad, en þar á að hefjast framleiðsla á fiskeldiskvíum. Á næsta ári standi til að byggja upp starfsemina í Auric og flytja hluta framleiðslu Hampiðjunnar frá Litháen til Indlands. Stefnt er að því að sú framleiðsla verði komin í fullan rekstur árið 2028.