Grunaður um að hafa stolið rándýru úri af liðsfélaga sínum

Lamine Diaby, leikmaður Nice í frönsku úrvalsdeildinni, er grunaður um að hafa stolið úri liðsfélaga síns, Kaspers Dolberg.

Úri danska landsliðsmannsins var stolið úr búningsklefa Nice fyrr í þessum mánuði. Hann tilkynnti þjófnaðinn til lögreglu. Úrið er metið á 70.000 evrur.

Hinn 18 ára Diaby liggur undir grun en lögreglan á eftir að yfirheyra hann.

Ef satt reynist að Diaby hafi stolið úrinu eru dagar framherjans efnilega hjá Nice væntanlega taldir.

Dolberg, sem er 21 árs, kom til Nice frá Ajax í lok ágúst.

Diaby lék sex leiki fyrir Nice á síðasta tímabili en hann hefur verið hjá félaginu síðan hann var 13 ára. Hann á tæplega 20 leiki að baki fyrir yngri landslið Frakklands.