Þögn í London

Tveggja mínútna þögn var í Bretlandi á hádegi í dag eða 11 að íslenskum tíma til að minnast þeirra sem létust í sprengjuárásunum í London. Stöðvuðust meðal annars strætisvagnar og leigubílar um stund og gangandi vegfarendur stóðu kyrrir. Neðanjarðarlestir héldu þó áfram ferð sinni en fólk var beðið um að hafa hljótt á meðan. Þá voru engar lendingar eða flugtök voru frá Heathrow flugvelli eða Gatwick. Víða annars staðar í Evrópu var vinna stöðvuð í virðingarskyni við þá sem létust í sprengingunum en Kauphöll Íslands ákvað í samræmi við ákvörðun annarra kauphalla í Evrópu að hafa tveggja mínútna þögn í viðskiptakerfinu í dag. Þögnin hófst klukkan 11, á sama tíma og í hinum kauphöllunum. Lögreglan í Bretlandi vinnur nú að því að finna höfuðpaurinn og efnafræðinginn, sem taldir eru vera skipuleggjendur að árásunum, en ekki hefur verið gefið upp hvar líklegt sé að þeir haldi sig.