Ráðist á hjálparstarfsmenn á Srí Lanka

Srí Lanka, ap Sprengja varð fimm manns að bana á yfirráðasvæði Tamílatígra í norðurhluta Srí Lanka seint á þriðjudagskvöld. Fólkið var í sjúkrabíl og meðal þeirra sem létust voru tvær hjúkrunarkonur og einn læknir.

Þetta var haft eftir S. Puleedevan, einum yfirmanni uppreisnarmannanna, í gær. Hann skellti sökinni al­farið á sérsveitir stjórnarhersins og bætti við að svo virtist sem árásum stjórnar­hersins væri í auknum mæli beint gegn hjálparstarfsmönnum, því að í gær hefði önnur sprengja sprungið á svipuðum stað og þá hefði skotmarkið verið sendibíll læknis. Hann og aðrir farþegar sluppu ómeiddir.

Talsmaður stjórnarhersins, Upali Rajapakse, neitaði ásökununum og sagði að herinn sækti ekki inn á svæði Tamíla.

Um helgina fundust sautján lík starfsmanna franskra hjálparsamtaka og kenna stríðandi fylkingar hvor annarri um ódæðið.

Ekki náðist í Þorfinn Ómarsson í gær, en hann er talsmaður norrænu eftirlitssveitanna á Srí Lanka. Á næstu dögum verður tekin ákvörðun um hvort Norðmenn og Íslendingar haldi áfram eftirlitsstarfi á eyjunni.

Stjórnarherinn varpaði í gær sprengjum á vatnsveitusvæðið umdeilda, þrátt fyrir að Tamílatígrar hefðu opnað fyrir hana og veitt vatni á svæði stjórnarhersins.