Annar maður gaf sig fram

Ungur maður hefur verið handtekinn vegna tilraunar til að sprengja upp lest í Þýskalandi. Jihad Hamad er tvítugur að aldri og gaf sig fram við lögregluna í Líbanon í gær. Hinn maðurinn er árinu eldri og var handtekinn í Kiel í Þýskalandi síðastliðinn laugardag.

Mennirnir eru grunaðir um að hafa komið fyrir sprengjum í tveimur lestum á lestarstöðinni í Köln í lok júlímánaðar. Sprengjurnar voru heimatilbúnar og sprungu ekki.

Angela Merkel, kanslari Þýskalands, var ánægð með handtökuna, en þó gæti langt um liðið þar til málið verður tekið fyrir, því engir framsalssamningar eru í gildi milli Þýskalands og Líbanons.