Tap FlyMe tvöfaldast milli ára

Þótt velta FlyMe hafi aukist um 75 prósent á fyrri helmingi ársins, samanborið við árið 2005, jókst tap félagsins um helming á milli ára. Norræna lággjaldaflugfélagið tapaði 1,1 milljarði á fyrstu sex mánuðum ársins samanborið við 560 milljóna króna tap í fyrra.

Kostnaður jókst hröðum skrefum einkum vegna stofnkostnaðar af Evrópuflugi en einnig komu olíuverðshækkanir sér illa við félagið rétt eins og önnur flugfélög.

Velta félagsins nam yfir 3,2 milljörðum króna og jókst farþegafjöldi um 66 prósent. Alls fóru yfir 440 þúsund farþegar með félaginu á fyrri hluta ársins.

Á hluthafafundi á dögunum var samþykkt að selja nýtt hlutafé fyrir rúma 1,8 milljarða króna sem núverandi hluthafar eiga forgang að. Stærstu hluthafarnir, sem ráða um 67 prósentum hlutafjár, hafa skuldbundið sig til að taka þátt í útboðinu, þar á meðal Fons, stærsti hluthafinn.

Ákveðið hefur verið að Matthías Imsland, hjá Fons, taki virkan þátt við stjórnun félagsins og verði varaformaður stjórnar en Björn Olegård verður áfram stjórnarformaður.