Marel verður stærst í heimi með Stork

Komi til samruna Marels hf. og matvælavinnslukerfahluta Stork-samstæðunnar hollensku verður til stærsta fyrirtæki sinnar tegundar í heiminum.

Boðað hefur verið til hluthafafundar í Stork-samstæðunni á fimmtudag þar sem kosið verður um þá tillögu stærstu hluthafanna, bandarísku fjárfestingarsjóðanna Centaurus Capital og Polson & Co., að selja margvíslega starfsemi frá kjarnastarfsemi Stork sem er flugiðnaður. Þar á meðal yrði selt frá samstæðunni Stork Food Systems.

Marel á, ásamt Landsbankanum og Eyri Invest, átta prósenta hlut í Stork og hefur síðustu átta ár starfað náið með Stork Foods.

Talið er nánast öruggt að atkvæði falli þannig á fimmtudaginn að Stork verði skipt upp, en fjárfestingarsjóðirnir tveir, sem fóru fram á fundinn, ráða yfir um 32 prósentum hlutafjár í samstæðunni. Marel hefur ekki enn viljað gefa upp hvernig fyrirtækið kýs, en ljóst er að samruni við Stork Foods er í samræmi við áætlanir félagsins. Marel hefur líka nýlokið hlutafjárútboði og hefur burði til að ráðast í verkefnið.

Framtíð Stork er deiluefni í Hollandi, enda á félagið sér þar 179 ára sögu. Í fjölmiðlaumfjöllun hefur málum verið stillt upp á þann veg að þar takist á andstæðir pólar kaldrar peningahyggju bandarísku fjárfestingarsjóðanna og eldri gilda sem forstjóri félagsins standi fyrir. Forstjórinn, Sjoerd Vollebrecht, er á móti skiptingu félagsins og hefur meiri áhuga á stækkun, svo sem með yfirtöku á Marel.

Stjórnendur Stork og Marel eru sammála um að þessi fyrirtæki séu fremst á sínu sviði og passi vel saman. Sjóðirnir vilja skerpa áherslur og að Stork einbeiti sér að grunnþættinum, flugiðnaði. Við erum sammála báðum, segir Árni Oddur Þórðarson, stjórnarformaður Marels en segir ljóst að nú sé einstakt tækifæri til að búa til heimsleiðtoga á sviði matvælaframleiðslu.