Clippers vann grannaslaginn

Los Angeles Clippers vann í nótt góðan sigur á grönnum sínum í Los Angeles Lakers 102-93 í NBA deildinni í körfubolta. Kobe Bryant skoraði 39 stig fyrir Lakers, en Elton Brand skoraði 32 stig og hirti 11 fráköst en hann skoraði megnið af stigum sínum í síðari hálfleik.

Atlanta lagði Indiana eftir framlengdan leik 117-112. Joe Johnson skoraði 40 stig og gaf 13 stoðsendingar hjá Atlanta, en Peja Stojakovic skoraði 34 stig fyrir Indiana.

Orlando vann Seattle 102-89. Dwight Howard skoraði 23 stig og hirti 16 fráköst fyrir Orlando, en Damien Wilkins setti 21 stig fyrir Seattle.

Washington lagði Cleveland á útivelli 102-94. Gilbert Arenas skoraði 26 stig og gaf 9 stoðsendingar fyrir Washington, en LeBron James skoraði 25 stig og gaf 9 stoðsendingar fyrir Cleveland. Nokkrir áhorfendur bauluðu þó á James undir lok leiksins, því hann hitti ekki úr einu einasta skoti utan af velli í lokaleikhlutanum og skelfilega af vítalínunni.

Denver vann nauman útisigur á Minnesota 103-102 eftir framlengingu. Carmelo Anthony skoraði 30 stig og sigurkörfu Denver í leiknum, en Kevin Garnett skoraði 23 stig og hirti 15 fráköst.

New Jersey lagði New York 94-90. Channing Frye skoraði 20 stig fyrir New York og Steve Francis skoraði 16 stig í sínum fyrsta leik fyrir liðið. Richard Jefferson skoraði 27 stig fyrir New Jersey.

San Antonio lagði Memphis 83-80 á útivelli og hefur unnið alla þrjá leiki sína við Memphis í vetur. Tim Duncan skoraði 19 stig og hirti 16 fráköst í liði meistaranna, en Pau Gasol skoraði 21 stig og hirti 12 fráköst hjá Memphis.

Detroit lagði Chicago 95-87. Chauncey Billups skoraði 17 stig og gaf 12 stoðsendingar fyrir Detroit, en Ben Gordon skoraði 24 stig fyrir Chicago í leik þar sem 7 tæknivillur voru dæmdar - þar af tvær á Richard Hamilton hjá Detroit sem var fyrir vikið sendur í bað.

Houston vann fyrsta leik sinn í vetur án Tracy McGrady þegar liðið skellti Golden State 91-88. Yao Ming skoraði 22 stig og hirti 21 frákast fyrir Houston, en Jason Richardson skoraði 39 stig fyrir Golden State.

Philadelphia lagði Milwaukee 116-111. Kyle Korver skoraði 31 stig og Allen Iverson 30 fyrir Philadelphia, en Joe Smith skoraði 32 stig fyrir Milwaukee.

Boston lagði að lokum Portland 102-96. Paul Pierce skoraði 37 stig, hirti 7 fráköst og gaf 7 stoðsendingar fyrir Boston, en Martell Webster skoraði 24 stig og hirti 8 fráköst hjá Portland.