Getum skorað tvö mörk

Rafa Benitez hefur ekki áhyggjur af að hans menn nái ekki að skora þau tvö mörk sem liðið þarf á að halda í leiknum gegn Benfica á Anfield í kvöld, þegar liðin spila síðari leik sinn í Meistaradeildinni. Benfica vann fyrri leikinn 1-0.

Framherjar Liverpool hafa alls ekki verið á skotskónum síðan um áramótin, en Benitez á von á að áhorfendur geti hjálpað þeim að finna netmöskvana í kvöld.

"Ég hef trú á liðinu og ég vona að áhorfendurnir hjálpi okkur að leggja enn harðar að okkur. Við höfum skorað mörk áður í þessari keppni og ég veit að ef við sköpum færi fyrir framherjana, munu þeir skora. Mér finnst mikið talað um að framherjar okkar skori ekki mörg mörk, en mér er alveg sama hver skorar mörkin ef við bara komumst áfram. Við eigum bestu stuðningsmenn í heimi og þeir munu setja pressu á Benfica og hjálpa okkur að gera það sem við þurfum að gera," sagði Benitez.