Ronaldinho er ekki til sölu

Roman Abramovich eigandi Chelsea virðist vekja ótta hvar sem hann kemur, því á blaðamannafundi eftir leik Barcelona og Chelsea þótti Frank Rijkaard ástæða til að taka það fram að peningar gætu ekki keypt snillinginn Ronaldinho frá Barcelona.

Abramovic hefur hingað til ekki látið háa verðmiða á leikmönnum aftra sér frá því að kaupa þá og eftir að Ronaldinho skoraði mikilvægt mark fyrir Barcelona í gær, virðist sem fjölmiðlamenn hafi slegið því föstu að Abramovich ætlaði að gera tilboð í hann í kjölfarið.

"Ronaldinho fæst ekki fyrir peninga, sama hversu mikið það er. Hann er elskaður á Spáni og er búinn að koma sér vel fyrir hérna. Fyrir hann er fótboltinn ekki spurning um peninga, því hérna er hann partur af því sem við ætlum okkur með þetta lið í framtíðinni. Það kom mér líka ekkert á óvart að það skyldi vera hann sem gerði gæfumuninn hér í kvöld," sagði Rijkaard.