Newcastle vill fá mig

Framherjinn knái Fernando Torres hjá Atletico Madrid segir að Newcastle sé eina liðið sem hafi gert Atletico formlegt tilboð í sig, en Spánverjinn ungi er talinn muni fara frá félaginu í sumar. "Það hefur verið mikið talað um að þessi og hin félög hafi verið að bjóða í mig, en Newcastle er eina félagið sem hefur gert formlegt tilboð," sagði Torres.

Torres er aðeins 21 árs gamall og hefur verið eftirsóttur lengi. Hann verður í eldlínunni með spænska landsliðinu á HM í sumar, en hefur mikið verið orðaður við félög á Englandi. Fyrir nokkru sagði Torres að hann hefði áhuga á að leika með Arsenal, en þar að auki hafa lið eins og Tottenham og Chelsea verið sögð á höttunum eftir honum.