Ólæti á Craven Cottage

Fulham má búast við eftirmála í kjölfar leiksins gegn Chelsea í ensku úrvalsdeildinni í knattspyrnu í kvöld vegna óláta sem urðu að leik loknum á Craven Cottage, heimavelli Fulham.

Rauða spjaldið sem William Gallas fékk í blálokin fyrir að traðka á Heiðari Helgusyni var rétt byrjunin á því sem í kjölfarið kom en þegar hann loks gekk af velli lyfti hann þumalfingri snúið niður í áttina að stuðningsmönnum Fulham. Þegar svo flautað var til leiksloka ruddist fjöldi stuðningsmanna Fulham inn á völlinn í óstjórnlegri sigurvímu. Í kjölfarið ruddust nokkrir stuðningsmenn Chelsea einnig inn á völlinn og logaði allt í slagsmálum milli þeirra, vallarstarfsmanna og lögreglu.

Að minnsta kosti einn Chelsea stuðningsmaður var snúinn niður af lögreglu og það tók vallarstarfsmenn um 10 mínútur að rýma sjálfan knattspyrnuvöllinn æstum múgnum.