Hefur augastað á Henry og Nistelrooy

Massimo Moratti, eigandi Inter Milan á Ítalíu, hefur augastað á þeim Thierry Henry hjá Arsenal og Ruud Van Nistelrooy hjá Manchester United í leit sinni að framherja fyrir næstu leiktíð. Hann gerir sér þó litlar vonir um að krækja í Henry og segir Nistelrooy vera raunhæfara markmið fyrir félag sitt.

"Munurinn á þeim tveimur er sá að Ruud er ekki ánægður hjá Manchester United. Mér sýnist Henry vera mjög sáttur hjá Arsenal í dag og vera líklegur til að framlengja samning sinn við félagið. Það er allt annað ef leikmaðurinn sem maður hefur augastað á er farinn að hugsa sér til hreyfings," sagði Moratti, en ef Henry undirritar ekki framlengingu á samningi sínum fljótlega, mun verðmiðinn á honum líklega hrapa enda verður hann samningslaus árið 2007.