Enski boltinn hentar mér best

Þýski miðjumaðurinn Michael Ballack telur víst að spilamennskan á Englandi henti sínum leikstíl betur en til að mynda spilamennskan á Spáni, en víst er talið að Ballack gangi í raðir Chelsea í sumar.

"Ég held að leikstíllinn í ensku úrvalsdeildinni sé betur sniðinn að mínum leikstíl en til dæmis spænski boltinn," sagði Ballack í samtali við breska blaðið Daily Express. "Þar er hraðinn mikill og tæklingarnar harðar og það hentar mér vel. Það er líka gaman að horfa til manna eins og Roy Keane og Patrick Vieira sem hafa blómstrað á Englandi, en ég vil meina að leikstíll minn sé ekki ósvipaður þeirra," sagði Ballack.