Nýr samningur í sjónmáli fyrir Andy Cole

Sóknarmaðurinn Andy Cole segir að styttist óðum í að hann undirriti framlengingu á samningi sínum við félagið. Cole er 34 ára gamall og mun ekki leika meira með liði City á þessu tímabili vegna hnéuppskurðar sem hann fór í á dögunum.

"Það er mjög stutt í það að ég skrifi undir samninginn og í raun má segja að málið sé í höfn," sagði Cole og viðurkenndi að hann væri vonsvikinn að geta ekki spilað meira á leiktíðinni. "Í fyrstu héldum við að þetta væru bara minniháttar meiðsli en annað kom í ljós. Stundum er þetta bara svona í fótboltanum, maður verður víst að sætta sig við það, en það sem stendur uppúr er hvað allir hafa sýnt mér mikinn stuðning eftir aðgerðina," sagði Cole sem gekk til liðs við City frá Fulham.